Олимпиадани илк бор Қозоғистоннинг бешта телеканали трансляция қилади

ASTANA. Kazinform — Франция пойтахти Париж шаҳрида бўлиб ўтадиган XXXIII Ёзги Олимпия ўйинлари жорий йилда илк бор Қозоғистоннинг бешта телеканали орқали намойиш этилади.

Бу ҳақда Kazinform мухбирига эксклюзив суҳбат берган ҚР Туризм ва спорт вазирининг жамоатчилик ва оммавий ахборот воситалари билан алоқалар бўйича маслаҳатчиси Диас Ахметшарип маълум қилди.

“Бу йил, яъни Париж–2024 Олимпиада ўйинларида илк бор мамлакатнинг бешта телеканали жонли эфирда намойиш этаяпти. Булар - Qazaqstan, Qazsport, “Хабар“, “Ел арна“ ва Jibek Joly телеканалларидир. Ушбу 5 та канал ўйиннинг расмий очилиш маросимини бир вақтнинг ўзида жонли эфирда намойиш этади. Ўйин бошлангандан сўнг эса ҳар бир канал спорт турига қараб турли вақтларда мусобақани жонли эфирда намойиш қила бошлайди. Қайси канал қайси мусобақани кўрсатишини бўлиб олган. Бироқ мусобақанинг катта қисмини Qazsport телеканалида томоша қилишингиз мумкин. Чунки бу ихтисослашган спорт канали”, - деди вазир маслаҳатчиси.

Эслатиб ўтамиз, айни дамда тўрт йиллик мусобақага йўлланмани қўлга киритган қозоғистонлик спортчилар сўнгги машғулотларни ўтказишмоқда.

Қозоғистон терма жамоаси спортнинг 25 та тури бўйича Олимпия ўйинларига 80 та йўлланмани қўлга киритди.

Хусусан, бокс, дзюдо, гимнастика, енгил атлетика, байдарка ва каноэда эшкак эшиш, отиш, қиличбозлик, юнон-рум кураши, эркин кураш, камондан отиш, стенддан ўқ отиш, теннис, велошоссе, сузиш, замонавий бешкураш, таэквондо, гимнастика, бадминтон, академик эшкак эшиш, бадиий гимнастика, триатлон, стол тенниси, қояга кўтарилиш ва брейкинг бўйича Олимпия ўйинларида иштирок этади.

Франция пойтахти Париж шаҳрида бўлиб ўтадиган XXXIII ёзги Олимпия ўйинлари 26 июлдан 11 августгача бўлиб ўтади. Ўйинларда 205 давлатдан 10 500 нафар спортчи иштирок этиши режалаштирилган. Унда 32 спорт туридан 329 та медаллар жамланмаси ўйналади.