Мамлакатимизда қонун ва тартиб мустаҳкам тамойилга айланиши керак – ҚР Президенти
ASTANA. Kazinform – Президент тантанали тадбирда сўзга чиқиб, мамлакатдаги дипломатия соҳаси ходимлари ва фахрийларини касб байрами билан табриклади. Бу ҳақда Ақорда матбуот хизмати хабар берди.
«Аждодларимиз асрлар давомида “дала дипломатияси” билан ҳаёт кечирган. Халқимизнинг келишувчилик анъанаси туфайли Улуғ Далада тинчлик ва тотувлик намунаси шаклланган. Ҳурмат ва ўзаро эҳтиром доимо муқаддас қадрият сифатида эъзозланган. Ушбу азалий қоида – ташқи сиёсатимизнинг мустаҳкам пойдевори ва ўзгармас мезони”, – деди Давлат раҳбари.
Президент Астанада Осиёда ҳамкорлик ва ишонч чоралари бўйича кенгаш (ОҲИЧК) штаб-квартирасининг очилишини ҳақиқий тарихий воқеа сифатида қайд этди.
“30 йилдан кўпроқ вақт аввал Қозоғистон ОҲИЧКни тузиш ташаббусини илгари сурди. Бу қадам халқаро ҳамжамият томонидан минтақа давлатлари саъй-ҳаракатини барқарорлик ва хавфсизлик йўлида бирлаштиришга қаратилган муҳим ташаббус сифатида қўллаб-қувватланди. Биз бошиданоқ фақат ҳамкорлик, ўзаро англашув ва мулоқот орқали тинчлик ва тараққиётга эришиш мумкинлигини ишонч билан айтганмиз. Бугун ОҲИЧК томонидан ишончни мустаҳкамлаш тамойили янада долзарб аҳамият касб этмоқда. Осиё аҳолисининг 90 фоизини қамраб олган ва дунё аҳолисининг ярмидан кўпроғини бирлаштирган ушбу тузилма халқаро муносабатлар архитектурасида муҳим ўрин эгаллаб бормоқда”, – деди Қасим-Жомарт Тоқаев.
Президент геосиёсий зиддиятлар кучайиб, кўп томонлама ҳамкорлик асослари заифлашиши минтақавий ва глобал барқарорликка жиддий таҳдид солаётганини таъкидлади.
“Жаҳон олдин бўлмаган мураккаб жараёнлар билан юзма-юз келмоқда. Бу жараёнларни пухта таҳлил қилиб, теран англашимиз зарур. Ачинарлиси, халқаро ҳуқуқ асослари босқичма-босқич емирилмоқда, ўзини қонунлардан устун деб ҳисобловчи кучлар пайдо бўлмоқда. Бундай вазиятда барча давлатлар халқаро ҳуқуқ ва БМТ Низоми тамойилларига қатъий амал қилиши, умумий нормаларни бир томонлама талқин қилмаслиги муҳим”, – деди Давлат раҳбари.
Қасим-Жомарт Тоқаевга кўра, Қозоғистон кенг қамровли сиёсий ва иқтисодий ислоҳотларни изчил амалга ошириш ниятида.
“Мен Президент сифатида мамлакатимизда қонун ва тартиб мустаҳкам тамойилга айланиши шарт, деб ҳисоблайман. Олиб борилган ислоҳотлар натижасида тинч йиғилишлар ҳақидаги қонун такомиллаштирилди, сиёсий партияларни рўйхатга олиш талаби енгиллаштирилди. Тўҳмат учун жиноий жавобгарлик бекор қилинди, ўлим жазоси олиб ташланди. Бу чора-тадбирлар Қозоғистоннинг демократия қадриятларига, қонун устуворлигига содиқ эканини кўрсатади”, – деди ҚР Президенти.
Давлат раҳбари энергетика, транспорт ва рақамлаштириш соҳаларида инфратузилмани кенг кўламда ривожлантиришга қаратилган чора-тадбирларга тўхталиб ўтди.
“Қозоғистон халқаро шериклар билан темир йўл ва автойўл коридорлари, денгиз портлари, умуман олганда транзит ва логистика соҳасини модернизация қилишни фаол бошлади. Рақамли трансформация ва сунъий интеллект – мамлакатимизнинг рақобатбардошлиги кафолати. Биз Қозоғистонни рақамли давлатга айлантиришни мақсад қилганмиз. Чунки сунъий интеллект ўсиши инновациялар ва рақамли мустақилликнинг асосий ҳаракатлантирувчи кучи ҳисобланади. Шу стратегик муҳим йўналишда саъй-ҳаракатларни жипслаштириш учун Сунъий интеллектни ривожлантириш бўйича кенгаш туздик. Яқин вақт ичида янги кучли суперкомпьютер ишга туширилади”, – деди Президент.
Қасим-Жомарт Тоқаев қишлоқ хўжалигини модернизация қилишни яна бир стратегик устувор йўналиш сифатида қайд этди. Бу соҳа мамлакат иқтисодиётини диверсификация қилиш ва озиқ-овқат хавфсизлигини таъминлашда муҳим ўрин тутади.
“Биз глобал қиймат занжирига тўлиқ интеграциялашган, иқлим ва барқарор ривожланиш мақсадларига мос келадиган барқарор иқтисодиёт пойдеворини қўймоқдамиз. Ушбу узоқ муддатли мақсадларга эришиш учун халқаро шериклар билан яқин ҳамкорликни йўлга қўйишдан манфаатдормиз. Шу фурсатдан фойдаланиб, бу муҳим ташаббусларни амалга оширишга ҳисса қўшган дипломатлар жамоасининг алоҳида ролини таъкидлаб ўтмоқчиман”, – деди Президент.
Сўз якунида Қасим-Жомарт Тоқаев барча ОҲИЧК иштирокчиларига муваффақият тилаб, ушбу ташкилотга юқори даражада раислик қилгани, мулоқотни мустаҳкамлашдаги улкан хизмати ва ОҲИЧКнинг институционал ривожига қўшган ҳиссаси учун Қозоғистоннинг ишончли дўсти – Озарбайжон мамлакатига миннатдорчилик билдирди.