Мамлакатнинг саноат ривожланишига янги туртки бериш керак - Қозоғистон Президенти

ASTANA. Kazinform — Давлат, биринчи навбатда, келажакда мамлакатимиз иқтисодий ривожланишига асос бўладиган йирик ва инновацион лойиҳаларни қўллаб-қувватлаши керак. Бу ҳақда Ҳукуматнинг кенгайтирилган йиғилишида Президент Қасим-Жомарт Тоқаев маълум қилди.

“Мамлакатнинг саноат ривожланишига янги туртки бериш керак. Ўтган йили саноат сиёсатини аниқ ва самарали олиб бориш учун алоҳида вазирлик ташкил этилди. Орадан бироз вақт ўтди, энди иш натижаларини кўрсатиш вақти келди. Вазирлик соҳани ривожлантириш йўналишларини белгилаб, инвесторларни йўналтириши керак. Илғор технологиялардан фойдаланган ҳолда янги ишлаб чиқаришларни очиш керак. Бироқ аниқ чора-тадбирлар ва усуллар тайёр эмас”, — деди Қасим-Жомарт Тоқаев.

Президент таъкидлаганидек, ишлаб чиқариш ривожига туртки бўладиган лойиҳалар рўйхати бор, бироқ бу ишлар тўлиқ якунига етмаган.

“Бу тармоқлар иқтисодиёт структурасини ўзгартириши, мамлакатнинг кучли саноат базасини яратиши ва технологик ўсишни таъминлаши керак. Ҳозирча буларнинг ҳеч бири натижа бермади. Кўпгина лойиҳаларни молиялаштириш манбалари аниқланмаган. Давлат, биринчи навбатда, келажакда мамлакатимиз иқтисодий ривожланишига асос бўладиган йирик ва инновацион лойиҳаларни қўллаб-қувватлаши керак. Айни пайтда мавжуд ишлаб чиқаришларни модернизация қилиш билан бирга, мамлакатимиз учун мутлақо янги ишлаб чиқариш қувватларини очишга алоҳида эътибор қаратиш лозим”, — деди Давлат раҳбари.

Эслатиб ўтамиз, Ҳукумат уйида қайта тузилган Ҳукуматнинг кенгайтирилган йиғилиши бўлиб ўтмоқда.