Ли Чжэ Мён Жанубий Кореядаги президентлик сайловларида ғалаба қозонди: у ким

ASTANA. Kazinform – Демократик «Тобуро» партиясидан номзодини қўйган Ли Чжэ Мён Жанубий Кореядаги президентлик сайловларида ғалаба қозонди.

Ҳозирда овозлар санаб бўлинган ва 100% натижалар эълон қилинган. Ли Чжэ Мён 49,42 фоиз, унинг рақиби Ким Мун Су 41,15 фоиз овоз тўплади.

61 ёшли Ли Чжэ Мён илк бор 2017 йилда Демократик партия праймеризлари чоғида мамлакат эътиборига тушган эди. 2022 йилги президентлик сайловларида у Юн Сок Ёльга қийинчилик билан ютқазди.

2024 йилги умумий сайловда Ли қайта сайланди ва Демократик партияни ғалабага олиб келди. Бу унинг асосий мухолифат етакчиси ва Юн Сок Ёль маъмуриятининг асосий танқидчиси сифатидаги обрўсини мустаҳкамлади, деб ёзади Asia Pacific Foundation of Canada.

Таҳлил марказига кўра, Ли Чжэ Мённинг дастури прагматик ташқи сиёсатга асосланган. У Шимолий ва Жанубий Корея ўртасида ишончни мустаҳкамлаш, шунингдек, Хитой ва Россия билан муносабатларни яхшилашга устувор аҳамият беради. Шунингдек, у ракетага қарши мудофаа ва зарба бериш имкониятларини кучайтириш муҳимлигини тан олади. Унинг фикрича, уруш бошланган тақдирда Жанубий Кореяга АҚШ ва Корея қўшма кучлари устидан оператив назорат берилиши керак.

Yonhap агентлигининг хабар беришича, Ли сайловолди ташвиқоти чоғида Юн Сок Ёль бошчилигидаги “хоин кучлар”ни бостиришга ваъда берган. Бу баёнот Юн Сок Ёльга импичмент эълон қилинганидан кейин айтилган.

2025 йил 3 июнь куни Жанубий Кореяда президентлик сайловлари бўлиб ўтди. Дастлаб бу сайловлар 2027 йилга белгиланган эди, бироқ Юн Сок Ёль лавозимидан четлатилгани сабабли муддатидан олдин ўтказилди. 2025 йил 4 апрелда Конституциявий суд унинг импичментини тасдиқлади.

Бу сафар сайловда ғалаба қозонган номзод овоз бериш натижалари расман тасдиқланганидан сўнг дарҳол президентлик лавозимига киришади.