Кўпчилик меҳнат муҳожирлари Қозоғистонга Хитойдан келади

ASTANA. Kazinform – 2025 йил 1 апрель ҳолатига кўра, Қозоғистонда маҳаллий ижро ҳокимияти органлари рухсатномалари билан 13 891 нафар чет эл фуқароси ишламоқда, деб хабар беради Kazinform ҚР Меҳнат ва аҳолини ижтимоий ҳимоя қилиш вазирлигига таяниб.

Хорижий ишчи кучини жалб қилиш учун берилган рухсатномалар қаторига қуйидаги тоифалар киради: раҳбарлар ва уларнинг ўринбосарлари учун 570 та рухсатнома (биринчи тоифа), таркибий бўлинма раҳбарлари учун 2439 та рухсатнома (иккинчи тоифа). Жалб этилган хорижий ишчиларнинг асосий қисми учинчи (мутахассислар) ва тўртинчи (малакали ишчилар) тоифаларига тегишли - мос равишда 4541 ва 1023 киши. Шунингдек, 1709 нафари мавсумий ишларга, 3609 нафари корпоратив трансферлар доирасида ишга қабул қилинди.

Ҳозирда Қозоғистонда 1768 иш берувчи хорижий ишчилардан фойдаланади. Уларда 376 мингдан ортиқ Қозоғистон фуқаролари ишлайди, бу эса умумий ходимлар сонининг 96,4 фоизини ташкил этади.

Иқтисодий фаолият турлари бўйича энг кўп қуйидаги соҳаларда ишлайди: қурилишда – 5131 киши, қишлоқ, ўрмон ва балиқ хўжалигида – 1695 киши, тоғ-кон саноатида – 1351 киши, ишлаб чиқариш саноатида – 1232 киши.

Меҳнат мигрантларининг асосий келиб чиқиш мамлакатлари: Хитой – 4885 киши, Ўзбекистон – 1614 киши, Ҳиндистон – 1150 киши, Туркия – 1124 киши.

Эслатиб ўтамиз, ички меҳнат бозорини ҳимоя қилиш мақсадида Қозоғистон Республикаси Меҳнат ва аҳолини ижтимоий ҳимоя қилиш вазирлиги ҳар йили республикага чет эллик мутахассисларни жалб қилиш учун квота белгилайди ва тақсимлайди.

2025 йилда республикада ишчи кучига нисбатан умумий квота 0,2 фоиз ёки 14,8 минг бирлик қилиб белгиланган бўлса, жорий йилнинг март ойидан бошлаб маҳаллий ижро этувчи ҳокимият органларининг мурожаатлари билан боғлиқ ҳолда вазир буйруғи билан 16,5 минг бирликка оширилди.