ҚР Президентига ҚТЖнинг режалари ҳақида маълумот берилди

Давлат раҳбари «Қазақстан темір жолы» МК» АЖ бошқаруви раиси Нурлан Сауранбаевни қабул қилди, деб хабар беради Каzinform агентлиги Ақорда матбуот хизматига таяниб.

Қасим-Жомарт Тоқаевга миллий компаниянинг 2023 йилдаги фаолиятининг асосий якунлари ва келгуси даврга мўлжалланган режалар ҳақида маълумот берилди.

Нурлан Сауранбаев маълум қилганидек, сўнгги уч йил ичида “ҚТЖ” МК” АЖ асосий ишлаб чиқариш кўрсаткичлари ўсиш суръатларини кўрсатди. 2023 йилда юк айланмаси 7 фоизга ошиб, 270 миллиард тонна-километрга етди. Транзит юк ташиш ҳажми 18 фоизга ошди ва 27 миллион тоннадан ошди. Натижада компания даромади ўтган йилга нисбатан 29,3 фоизга ошиб, 1,9 триллион тенгени ташкил қилди. 154 миллиард тенге соф фойда олинди, бу 2022 йилга нисбатан 4 баробар кўпдир. Бу компаниянинг тарихдаги энг яхши кўрсаткичлари.

Президентга “Достиқ – Мойинти” каби йирик инфратузилма лойиҳаларини амалга ошириш, Алмати вокзалини айланиб ўтувчи айланма темир йўл линиясини қуриш ва бошқалар ҳақида маълумот берилди. Бугунги кунга қадар 350 километрдан ортиқ йўл ётқизилди. Ушбу лойиҳаларнинг ишга туширилиши давлатлараро туташув пунктларининг ўтказиш қобилиятини оширади.

Давлат раҳбарига Хитойнинг энг йирик логистика марказида жойлашган Сиань қуруқ портида юк терминали қурилиши ниҳоясига етказилгани ҳақида маълумот берилди. Бу мамлакатга барқарор юк оқимини таъминлайди ва қозоғистонлик экспортёрлар учун янги бозорларга йўл очади.

Дунёнинг етакчи компаниялари Huawei, Wabtec ва PSA билан биргаликда “Ақлли темир йўл” лойиҳасини амалга ошириш бўйича ишлар олиб борилмоқда. Янги ечимларнинг жорий этилиши темир йўл ўтказиш қобилиятини оширади, ёқилғи сарфини оптималлаштиради ва поездлар ҳаракати хавфсизлигини оширади.

Учрашув якунида Давлат раҳбари компаниянинг инвестиция лойиҳаларини амалга ошириш муҳимлигини таъкидлаб, мамлакат транспорт-транзит салоҳиятини ривожлантиришга эътибор қаратди.