ҚР Президенти Туркий давлатлар ташкилотининг норасмий саммитида иштирок этди
BUDAPEST. Kazinform – Қасим-Жомарт Тоқаев Туркий давлатлар ташкилотининг норасмий саммити Будапешт каби қадимий шаҳарда юқори савияда ташкил этилгани учун Венгрия Бош вазири Виктор Орбанга миннатдорлик билдирди. Бу ҳақда Ақорда хабар берди.
“Бугунги нуфузли йиғилишнинг Европа қитъасида ўтказилаётгани алоҳида аҳамиятга эга. Биз венгр халқи қитъада муносиб ўрин эгаллаётганидан мамнунмиз. Бугун сизлар барчамизни бир тану бир жон туркий биродарлар сифатида кутиб олдингизлар. Бу, шубҳасиз, мустаҳкам дўстлигимиз ва бирдамлигимиздан далолат беради. Биз халқларимиз бирлигини мустаҳкамлаб, умумий тарихимиз ва анъаналаримизни ардоқлаб келмоқдамиз”, – деди ҚР Президенти.
Мамлакат раҳбарининг таъкидлашича, “Шарқ ва Ғарб кесишган нуқта” шиори остида ташкил этилган ушбу саммит туркий давлатлар манфаатларига ҳамда уларнинг стратегик мақсад ва вазифаларига мос келади. Ҳозирги мураккаб геосиёсий вазиятда ташкилот доирасидаги ҳамкорликнинг аҳамияти янада ошиб бормоқда.
Шу муносабат билан Қасим-Жомарт Тоқаев туркий халқлар ўртасида дўстлик ва ҳамкорликни мустаҳкамлаш, ташкилотнинг яхлитлигини сақлаш мақсадида Қозоғистон амалга ошираётган қатор ташаббусларни санаб ўтди.
“Жумладан, Туркий давлатлар ташкилоти ҳузурида Қозоғистоннинг Доимий вакилини тайинладик. Яқин орада Доимий ваколатхона очишни режалаштиряпмиз. 11-12 июнь кунлари Астанада Туркий давлатлар Парламент ассамблеясининг XIV пленар йиғилиши бўлиб ўтади. Ақтау шаҳри бу йил Туркий дунёси маданият пойтахти деб эълон қилинди. Ушбу нуфузли мақомни муносиб адо этиш учун аниқ чора-тадбирлар амалга оширилмоқда. Қозоғистон ташаббуси билан ўтган ҳафтада Марказий сайлов органларининг маслаҳатчи платформаси тузилди. Унинг биринчи йиғилиши муқаддас Туркистон шаҳрида муваффақиятли ўтди. Умумий келишувга мувофиқ, жорий йил июнь ойидан бошлаб Алмати шаҳри “Туркий давлатлар ташкилотининг ёшлар пойтахти” деб эълон қилинади. Мана шундай ташаббуслар орқали биз туркий бирдамликни мустаҳкамлаймиз”, – деди Президент.
Қасим-Жомарт Тоқаевнинг фикрича, Туркий давлатлар ташкилотига аъзо давлатлар биргаликда эришилган келишувларга содиқ қолиши шарт.
“Яна бир жуда муҳим масала – бу ташкилотимиз доирасида қабул қилинган ҳужжатлардаги қоидаларга қатъий риоя этиш. Бу жараёнлар тартиби бўладими, сиёсий ёки иқтисодий масалалар бўладими – барча келишув шартларини ҳурмат қилиш, уларга амал қилиш ва албатта ижро этиш керак”, – деди Президент.
Давлат раҳбари сўнгги пайтларда тарифларга оид вазият жаҳон савдо сиёсатини жиддий ўзгаришларга олиб келаётганига эътибор қаратди. У бундай инқирозлар нафақат таҳдид, балки янги имкониятлар манбаи эканини таъкидлади. Шу муносабат билан саноат, транспорт ва транзит, қишлоқ хўжалиги, рақамлаштириш каби йўналишларда биргаликда ҳаракат қилишни таклиф этди.
Қасим-Жомарт Тоқаев Марказий йўлакни Шарқ ва Ғарбни боғловчи асосий кўприкка айлантиришни стратегик вазифа сифатида қайд этди. Шу нуқтаи назардан, Президент Қозоғистон Қирғизистон ва Ўзбекистон билан чегарада расмийлаштириш жараёнларини рақамлаштириш, юк транзитини енгиллаштириш бўйича аниқ чоралар кўраётганини, шунингдек, Қозоғистон–Хитой чегарасида учинчи темир йўл ўтказиш пунктини очишни режалаштираётганини маълум қилди.
Шу муносабат билан Қасим-Жомарт Тоқаев биродар мамлакатларни йирик инфратузилмавий лойиҳаларни, жумладан “Шимол–Жануб” йўналиши бўйича халқаро транспорт йўлагини биргаликда ривожлантиришга чақирди. Ушбу лойиҳа туркий давлатларнинг минтақавий транзит маркази сифатидаги ўрнини сезиларли даражада мустаҳкамлайди.