ҚР Президенти ТРК ва CMG Қозоғистон ва Хитой раҳбарлари иштирокида меморандумни имзолади

ASTANA. Kazinform – Бугун Астана шаҳрида Хитой Халқ Республикаси Раиси Си Цзиньпиннинг Қозоғистон Республикасига давлат ташрифи доирасида ҚР Президенти Телерадиокомплекси ва Хитой Медиакорпорацияси (CMG) ўртасида ҳамкорлик бўйича ўзаро англашув меморандуми имзоланди.

Ҳужжатларни имзолаш маросими Ақордада Қозоғистон Президенти Қ.К.Токаев ва Хитой раҳбари Си Цзиньпин иштирокида бўлиб ўтди. Ҳужжатни Президент Телерадиокомплекси директори Раушан Қажибаева ва Хитой Медиакорпорацияси президенти Шэнь Хайсюн имзолади.

“Бугун имзоланган меморандум медиа-контент алмашиш ва икки давлат ҳаётидаги муҳим воқеаларни чоп этишда ўзаро ёрдам кўрсатишни назарда тутади”, – деди Раушан Қажибаева.

Бунгача томонлар «Silk Way» ва CGTN телеканаллари ўртасида биринчи қўшма “Астана-Пекин” телекўпригини ўтказдилар ҳамда Астанадаги ШҲТ саммитига бағишланган ток-шоу ва «Silk Way» телеканалида “Ипак йўли симфонияси” ҳужжатли фильмини намойиш этди. Яқин кунларда CGTN каналида ҚР Президенти Телерадиокомплексининг “Шанхай руҳи” ҳужжатли фильми намойиш этилиши режалаштирилган.

ҚР Президенти ТРК директори Раушан Қажибаеванинг сўзларига кўра, “Телерадиокомплекс ва CMG ўртасидаги ҳамкорлик Қозоғистон ва Хитой ўртасидаги стратегик шериклик руҳига мос келади ва кўп асрлик маданиятлараро ва халқаро ҳамкорликни ривожлантиришга қаратилган”.

ҚР Президенти Телерадиокомплекси тўлиқ циклли Қозоғистон медиа компанияси бўлиб, унинг таркибига: Jibek Joly республика телеканали, Silk Way ва Silk Way Cinema халқаро телеканаллари, Kazinform ХАА ва Ҳужжатли фильмлар маркази киради.

Хитой Медиакорпорацияси (CMG) дунёдаги энг йирик медиа конгломератларидан биридир. У Хитой марказий телевидениеси (CCTV), Хитой халқаро телевизион тармоғи (CGTN), Хитой миллий радиоси (CNR) ва Хитой халқаро радиосини (CRI) ўз ичига олади. Корпорация таркибига жами 47 та телеканал, 17 та радиостанция ва 17 та газета киради.