ҚР Президенти Тожикистон Ташқи ишлар вазирини қабул қилди
ASTANA. Kazinform – Қасим-Жомарт Тоқаев Астана шаҳрига расмий ташриф билан келган Тожикистон Ташқи ишлар вазири Сирожиддин Муҳриддинни қабул қилди.
Учрашувда Президент Қозоғистон ва Тожикистон ўртасидаги муносабатлар барча йўналишларда ижобий суръатларда ривожланиб бораётганини таъкидлаб, стратегик шерикликни янада мустаҳкамлаш муҳимлигини таъкидлади.
Давлат раҳбари ўтган йили имзоланган Иттифоқ муносабатлари тўғрисидаги шартнома Астана ва Душанбе ўртасидаги кўп қиррали ва муваффақиятли ҳамкорликнинг муҳим босқичи бўлганини эслатди.
“Биз Тожикистон билан дўстона муносабатларни юксак қадрлаймиз. Икки давлат ўртасида ҳал қилинмаган муаммо йўқ. Қозоғистон жамоатчилиги қардош тожик халқига алоҳида қизиқиш билдирмоқда. Мамлакатларимиз доимо бир-бирини қўллаб-қувватлайди. Бу икки томонлама муносабатларни фаол ривожлантириш истагидан далолатдир», – деди Президент.
Қасим-Жомарт Тоқаев Тожикистон Президенти Эмомали Раҳмоннинг қозоқ-тожик ҳамкорлигини оширишга қўшган беқиёс ҳиссасига алоҳида эътибор қаратди.
Сирожиддин Муҳриддин мустақиллик йилларида Қозоғистон ва Тожикистон ўртасида ўзаро манфаатли ҳамкорлик йўлга қўйилгани, бу ҳамкорлик қардош халқлар фаровонлиги йўлида дўстлик ва иттифоқчилик руҳида изчил ривожланиб бораётганини таъкидлади.
«Тожикистон Қозоғистон билан қардошлик ва яқин алоқаларни алоҳида ҳурмат қилади. Мамлакатингиз бизнинг муҳим ҳамкоримиздир. Икки томонлама ҳамкорликнинг барча йўналишларида ўзаро англашув мавжуд. Ўтган йил икки давлат муносабатлари учун муҳим йил бўлди, ҳамкорлигимиз иттифоқчилик даражасига кўтарилди», – деди вазир.
Тожик дипломати Қасим-Жомарт Тоқаевга Президент Эмомали Раҳмоннинг саломини етказди ва Тожикистон томони Қозоғистон билан ҳар томонлама ҳамкорликни янада чуқурлаштиришга қатъи қарор қилганини тасдиқлади.
Суҳбат чоғида юқори даражада эришилган келишувларни амалга ошириш масалалари кўриб чиқилди. Иқтисодиёт, савдо, транзит, рақамлаштириш, таълим ва маданият соҳаларида ҳамкорликни мустаҳкамлаш истиқболларига алоҳида эътибор қаратилди.
Қасим-Жомарт Тоқаев ва Сирожиддин Муҳриддин минтақавий хавфсизлик, сув-энергетика соҳасидаги ҳамкорлик ҳолати, шунингдек, Марказий Осиёнинг барқарор ривожланишини таъминлашга қаратилган қўшма чора-тадбирларни муҳокама қилди.