ҚР Президенти табиий офатга қарши курашаётган фуқароларга миннатдорчилик билдирди
PETROPAVL. Кazinform – Давлат раҳбари Шимолий Қозоғистон вилоятига амалий ташрифи чоғида сув тошқинидан жабр кўрган аҳолига ёрдам бераётган қутқарувчилар, кўнгиллилар ва ишбилармонлар билан учрашди, деб хабар беради Ақорда матбуот хизмати.
Қасим-Жомарт Тоқаев фавқулодда вазият вақтида вилоят аҳолиси юқори даражада ташкилотчилик кўрсатганини таъкидлаб, табиий офатга қарши курашаётган барча фуқароларга миннатдорчилик билдирди.
Қозоғистон халқи Ассамблеяси раисининг Шимолий Қозоғистон вилояти бўйича жамоатчилик ўринбосари Елена Семидоцких Президентга вилоятнинг ҳар бир туманида инсонпарварлик ёрдамини қабул қилиш пунктлари очилгани ҳақида маълумот берди.
«Birgemiz» волонтерлар фронт-офиси етакчиси Анастасия Волкова кўнгиллиларнинг фавқулодда вазиятларда ҳаракат қилиш штабини ташкил этиш ҳақида гапирди. Штаб 2500 дан ортиқ кўнгиллиларни тайёрлайди ва уларнинг фаолиятини мувофиқлаштиради.
«Севказэнерго» акциядорлик жамияти бош директори Анатолий Казановскийнинг айтишича, мазкур корхона акциядорлари томонидан 100 миллион тенге маблағ ажратилган, трансформаторлар ўрнатилиб, электр тармоқлари тортилган.
“Қизилжар йўллари” масъулияти чекланган жамияти директори Асхат Жолдаспаевнинг айтишича, корхона сел тошқинларига қарши чора-тадбирларда фаол иштирок этмоқда. Шу билан бирга, мазкур муассаса томонидан тўғонларни қуриш ва мустаҳкамлаш учун махсус техника ва зарур жиҳозлар ажратилмоқда.