ҚР Президенти Миллий жамғармани бошқариш бўйича кенгаш ваколатларини кенгайтирди

ASTANA. Kazinform – Қозоғистон Республикаси Президенти Қасим-Жомарт Токаев «Қозоғистон Республикасининг Миллий жамғармасини бошқариш бўйича кенгаш ҳақидаги айрим масалалар тўғрисида»ги Фармонга имзо чекди.

Ушбу ҳужжат янги Бюджет кодекси кучга кириши муносабати билан қабул қилинди ва Президент ҳузуридаги Миллий жамғармани бошқариш бўйича кенгашнинг ролини кучайтиришга қаратилган.

Кенгаш – Президент ҳузуридаги маслаҳат-далолат берадиган орган бўлиб, Миллий жамғарма маблағларини фойдаланиш ҳамда Ягона жамғариб бориладиган пенсия фондининг (ЯЖБПФ) пенсия активларини бошқариш масалалари юзасидан таклифлар тайёрлайди.

Фармонга мувофиқ, Кенгаш қуйидаги вазифаларни амалга оширади:

• Жамғарма маблағларини шакллантириш ва самарали фойдаланиш бўйича таклифлар ишлаб чиқиш;
• Миллий жамғарма ҳисобидан республика бюджетига кафолатланган трансферт миқдори юзасидан таклифлар тайёрлаш;
• Бошқа молиялаштириш манбалари мавжуд бўлмаган ҳолларда умуммиллий аҳамиятга эга объект ва лойиҳаларни молиялаштириш учун жамғармадан мақсадли трансфертлар ҳажми ва йўналишларини кўриб чиқиш;
• Миллий фаровонлик жамғармасининг қимматли қоғозларини сотиб олиш орқали лойиҳаларни жамғарма маблағлари ҳисобига молиялаштириш бўйича таклифлар тайёрлаш;
• Жамғарма маблағларини жойлаштиришга рухсат этилган молиявий воситалар рўйхатини белгилаш;
• ЯЖБПФ пенсия активларини самарали бошқариш бўйича таклифлар ишлаб чиқиш;
• Пенсия активларини инвестициялаш йўналишлари ва сотиб олишга рухсат этилган молиявий воситалар рўйхатини кўриб чиқиш;
• ЯЖБПФ фаолияти бўйича йиллик ҳисоботни таҳлил қилиш ва муҳокама этиш.

Кенгаш фаолиятига Қозоғистон Республикаси Президенти раҳбарлик қилади. Раис йиғилиш жойи ва вақтини белгилайди, уни олиб боради ҳамда Кенгаш аъзоларига мажбурий топшириқлар беради.

Кенгаш аъзолари йиғилиш кун тартибини тайёрлаш ва муҳокама қилишда иштирок этади, таклифлар киритади ва қарор қабул қилишда иштирок этади.

Йиғилишлар йилига камида бир марта очиқ ёки масофавий форматда ўтказилади. Қарорлар қатнашувчиларнинг кўпчилик овози билан қабул қилинади. Овозлар тенг бўлган ҳолда, Кенгаш раисининг овози ҳал қилувчи бўлади.

Кенгашнинг ишчи органи сифатида Қозоғистон Республикаси Президенти Администрацияси белгиланди. Кенгаш таркибида ўзгариш йўқ.

Кенгаш таркибига қуйидагилар киради:

• Қозоғистон Республикаси Президенти (Кенгаш раиси);
• Қозоғистон Республикаси Бош вазири;
• Қозоғистон Республикаси Парламенти Сенати раиси (розилиги билан);
• Қозоғистон Республикаси Парламенти Мажилиси раиси (розилиги билан);
• Президент Администрацияси раҳбари;
• Миллий банк раиси;
• Бош вазирнинг биринчи ўринбосари;
• Олий аудитор палатаси раиси;
• Молия вазири;
• Миллий иқтисодиёт вазири.

Фармон 2025 йил 4 июлдан кучга кирди.