ҚР Президенти Қуаниш Султановга “Отан” орденини тантанали равишда топширди

ASTANA. Kazinform – ҚР Президенти атоқли давлат ва жамоат арбоби Қуаниш Султановга “Отан” орденини тантанали равишда топширди, деб хабар берди Ақорда матбуот хизмати.

Қасим-Жомарт Тоқаев Қуаниш Султановни саксон ёшга тўлиши билан табриклаб, арбобнинг Қозоғистон тараққиётига қўшган ҳиссасини таъкидлади.

“Мустақилликнинг илк кунлариданоқ давлат ишларида фаол иштирок этдингиз. Сиз давлатчилигимиз пойдеворини мустаҳкамлашга хизмат қилдингиз. Вазир, кейин Бош вазир ўринбосари бўлдингиз. Сиз дипломатик хизматингизда мамлакатимиз хавфсизлигини мустаҳкамлашга салмоқли ҳисса қўшдингиз. Сиз Хитой Халқ Республикасидаги Фавқулодда ва Мухтор элчи бўлгансиз, шунингдек, Мўғулистон, Вьетнам, Шимолий Корея билан муносабатларни ривожлантириш йўлида сидқидилдан меҳнат қилгансиз. Сиз мамлакатимизда парламентаризм институтини ривожлантиришга улкан ҳисса қўшдингиз. Олий Кенгаш депутати, раис ўринбосари бўлдингиз. Кейин уч марта Сенат, икки марта Мажилис депутати сифатида қонун ижодкорлиги марказида бўлдингиз. Сиз тегишли масалаларни кўтардингиз. Ҳозир ҳам жамоат ишларидан тўхтаганингиз йўқ. Сизнинг меҳнатсеварлигингиз, давлат арбоблигингиз, инсонпарварлигингиз ёшларга ўрнак бўлишига ишонаман», – деди Президент.

Қасим-Жомарт Тоқаев Қуаниш Султановнинг ёзувчи маҳоратига тўхталиб, у мамлакатдаги сиёсий ва ижтимоий жараёнларга бағишланган кўплаб асарлар ёзганини таъкидлади.

Қуаниш Султанов унинг юрт фаровонлиги йўлидаги меҳнатини муносиб баҳолаб, олий давлат мукофотларидан бири – “Отан” ордени билан тақдирлангани учун Президентга миннатдорлик билдирди.