ҚР Президенти Қозоғистонда “Шелл” концернининг 30 йиллигига бағишланган тантанали маросимда иштирок этди

Давлат раҳбари Қозоғистондаги “Шелл” концернининг 30 йиллигига бағишланган тантанали маросимда иштирок этди, деб хабар беради Kazinform ХАА Ақорда расмий сайтига таяниб.

Қасим-Жомарт Тоқаев “Шелл” халқаро энергетика концерни Қозоғистоннинг нефть-газ саноати соҳасидаги биринчи хорижий инвесторлардан бири эканлигини таъкидлади. Президентнинг сўзларига кўра, Қозоғистондаги Шелл концернининг 30 йиллиги саноат тарихидаги муҳим давр сифатида баҳоланади.

“Оғир йилларда “Шелл” иқтисодиётимизга катта сармоя киритиб, янги технология, илм-фан ютуқлари ва бебаҳо бошқарув тажрибасини олиб келди. Биз компаниянинг бу ишини юқори баҳолаймиз. “Шелл” сўнгги 30 йил ичида мамлакат иқтисодиётига 18 миллиард доллардан ортиқ сармоя киритиб, Қозоғистондаги энг йирик хорижий инвесторлардан бири сифатида ўз мавқеини мустаҳкамлади”, – деди Давлат раҳбари.

Президент Шелл концерни бошқа ҳамкорлар билан биргаликда мамлакатда йирик нефть-газ лойиҳаларини фаол амалга ошираётганини таъкидлади. Компания дунёдаги энг йирик нефть ва газ конденсат конларидан бири – Қарашиғанақнинг оператори ҳисобланади. Қарашиғанақни кенгайтириш лойиҳасининг босқичларини ўз вақтида амалга ошириш суюқ углеводородлар қазиб олишни 10-11 миллион тонна даражасида сақлашга хизмат қилади.

 

 

“Шелл” концерни ва бошқа акциядорларнинг уйғун ишлаши Қашағаннинг “аср лойиҳаси”ни ишга тушириш имконини берди. Бугунги кунда Шимолий Каспий лойиҳаси жаҳон энергетика бозорида муҳим ўрин тутади ва мамлакат нефть қазиб олишнинг 20 фоизини ўз ичига олади. Углеводородларни қазиб олиш билан бир қаторда уларни жаҳон бозорларига олиб чиқиш инфратузилмасини яратиш ҳам муҳим аҳамият касб этади. Бу йўналишдаги биринчи муваффақиятли лойиҳа Каспий қувурлари консорциумидир. Уни амалга оширишда “Шеврон”, “ЭНИ”, “Шелл”, “Лукойл” ва бошқа етакчи нефть компаниялари иштирок этди”, – деди Президент.

Давлат раҳбари Қозоғистондаги трансмиллий нефть-газ корпорациялари фаолияти мамлакатнинг юқори сармоявий жозибадорлигини, жумладан, инвесторларнинг ҳуқуқ ва манфаатларини ҳимоя қилишга қаратилган қонунчиликнинг доимий таъминланаётганидан далолат эканини таъкидлади.

Қасим-Жомарт Тоқаев компаниянинг ижтимоий масъулиятига алоҳида эътибор қаратди.

"Шелл" ўз лойиҳаларида ишлаш учун маҳаллий кадрларни жалб қилишга катта аҳамият беради. Бугунги кунда “Қарашиғанақ” ва “Қашаған” лойиҳаларида ишлаётган ходимларнинг 95 фоиздан ортиғини Қозоғистон фуқаролари ташкил этади. Шунингдек, мазкур концерн ёшларни экологик муаммоларни ҳал этиш, “Қуёш энергияси – мактабларга”, “Шелл эко-марафон” ва бошқа лойиҳаларни амалга оширишга фаол жалб этмоқда.

 

 

ҚР Президенти яқиндагина Мурожаатномасида кичик ва ўрта бизнесни ривожлантиришга алоҳида эътибор қаратганини эслатди. Унинг сўзларига кўра, “Шелл” ёш тадбиркорлар ва ижтимоий ҳимояга муҳтож тоифадаги аёлларни қўллаб-қувватлаш дастурлари орқали ушбу муаммони ҳал қилишга катта ҳисса қўшмоқда. Корхона уларга тадбиркорлик фаолиятини бошлаш учун бошланғич капитални тақдим этади. Давлат раҳбари концерннинг бу борадаги фаолиятини янада кенгайтириш имкониятлари катта эканини таъкидлади.

“Маҳаллий ишбилармонлар билан учрашувда лойиҳа-конструкторлик бюроларини Қозоғистонга ўтказишга кўмаклашиш, албатта, маҳаллий муҳандислар ва компанияларни жалб этиш бўйича топшириқ бердим. Маҳаллий ишлаб чиқариш улушини оширишда ишлаб чиқарувчиларимизга йирик нефть-газ лойиҳаларини амалга оширишга кенг йўл очиш муҳим аҳамиятга эга. Ишончим комилки, “Шелл” концернининг фаол ва конструктив позицияси Қозоғистон иқтисодиётини диверсификация қилиш ва компания нуфузини янада оширишга салмоқли ҳисса қўшади”, – деди Қасим-Жомарт Тоқаев.

Давлат раҳбари нутқи сўнгида компанияга мамлакат равнақи ва барқарор ривожланишига қўшган улкан ҳиссаси учун самимий миннатдорлик билдирди ва “Шелл” концерни Қозоғистоннинг энергетика соҳасидаги стратегик ҳамкорлардан бири эканини таъкидлади.

Қасим-Жомарт Тоқаев Қозоғистон нефть ва газ саноатини ривожлантиришга қўшган улкан ҳиссаси учун компаниянинг бир қатор ходимларини давлат мукофотлари билан тақдирлади.

 

 

Хусусан, Қозоғистондаги “Шелл” концерни раиси ўринбосари Қуралбек Келжанов III даражали «Барыс» ордени билан, давлат органлари билан алоқалар бўйича менежери Дияс Жубандиқов «Құрмет» ордени билан, меҳнат ресурслари ва хизмат кўрсатиш бошқармаси директори Сулушаш Избасарова ва конларни ўзлаштириш бўйича менежер Ғадилбек Ўксикбаев «Ерен еңбегі үшін» медаллари билан тақдирланди.