Қозоғистонда “Ота-оналар академияси” лойиҳаси ишга туширилади

ASTANA. Kazinform — “Ота-оналар академияси” лойиҳасини амалга ошириш 2025 йилда бошланиши режалаштирилган.

Бу ҳақда пойтахтда бўлиб ўтган Болалар таълими бўйича халқаро конференция иштирокчиларига йўллаган табрик мактубида ҚР Президенти ҳузуридаги Хотин-қизлар ишлари ва оилавий-демографик сиёсат бўйича миллий комиссия раиси, Маданият ва ахборот вазири Аида Балаева маълум қилди.

Хусусан, форумда вазирнинг нутқини ҚР Президенти ҳузуридаги Хотин-қизлар ишлари ва оилавий-демографик сиёсат бўйича миллий комиссия раиси ўринбосари Лаззат Сулеймен ўқиб эшиттирди.

“Тарбиявий масалаларнинг долзарблигини инобатга олган ҳолда, фарзанд тарбиясида ота-оналарнинг масъулиятини ошириш муҳим аҳамиятга эга. Маданият ва ахборот вазирлиги Бирлашган Миллатлар Ташкилотининг Болалар жамғармаси (ЮНИСЕФ), Таълим-маориф вазирлиги ва Қозоғистондаги Болалар фаровонлиги институти билан ҳамкорликда 2025 йилдан “Ота-оналар академияси” лойиҳасини амалга оширишни бошлайди”, деди А. Балаева.

Ушбу лойиҳа доирасида болаларни тарбиялаш бўйича илғор халқаро ва миллий тажрибалар тўпланади, ота-оналарнинг доимий ахборот ва малакасини ошириш учун платформа яратилади.