Қозоғистонда нечта қор қоплонлари бор

ASTANA. Kazinform - Қозоғистонда қор қоплонлари сони 90-йилларга нисбатан икки баравар кўпайди. Бу ҳақда Марказий коммуникациялар хизматида бўлиб ўтган брифингда Экология ва табиий ресурслар вазирлигининг Ўрмон хўжалиги ва ҳайвонот дунёси қўмитаси раиси Данияр Турғамбаев маълум қилди.

«Мустақиллик йилларида республикада алоҳида муҳофаза этиладиган табиий ҳудудларни кенгайтириш ва барпо этиш натижасида уларнинг майдони 869 минг гектардан 30,9 миллион гектарга кўпайди. Мамлакатимизда биохилма-хилликни сақлаш бўйича кўрилаётган чора-тадбирлар натижасида ноёб ёввойи ҳайвонларнинг сони сезиларли даражада ошди.

Бундан ташқари, қор қоплонлари сонини тиклаш бўйича қатор комплекс чора-тадбирлар амалга оширилди. Уларнинг асосий яшаш жойларида – 3,6 миллион гектар майдонда алоҳида муҳофаза этиладиган табиий ҳудудлар ташкил этилди», - деди қўмита раҳбари.

Унинг сўзларига кўра, ҳозирги вақтда қор қоплонлари яшайдиган ҳудудларнинг қарийб 70 фоизи алоҳида муҳофаза этиладиган ҳудудлар томонидан муҳофаза қилинади.

«Бунда ёзиб олиш ва мониторинг қилишнинг замонавий усуллари, фототузоқлар ва сунъий йўлдош телеметриясидан фаол фойдаланиляпти. Қор қоплонларини муҳофаза қилиш ва мониторинг қилиш бўйича кўрилган чора-тадбирлар натижасида уларнинг сони 90-йиллардаги энг паст кўрсаткичдан икки баравар кўпайиб, 180 тага етди», - деди Данияр Турғамбаев.