Қозоғистонда интерактив инвестиция харитаси ишлаб чиқилди
ASTANА. Кazinform - Қозоғистонда инвесторлар ва тадбиркорлар учун интерактив харита ишлаб чиқилди.
“Атамекен” палатаси Қозоғистоннинг инвестицион жозибадорлигини оширишга қаратилган иқтисодий ислоҳотлар жараёнида фаол иштирок этади ва хорижий инвестициялар учун “очиқ эшиклар” сиёсатига амал қилади. Барқарор ва башорат қилинадиган солиқ режимини таъминлаш, суд-ҳуқуқ тизимини такомиллаштириш ва адолатли ишбилармонлик муҳитини яратиш борасида ҳукумат билан ҳамкорлигимиз мустаҳкам. Миллий палата давлат томонидан қўллаб-қувватланадиган чора-тадбирлардан очиқ ва тенг фойдаланишни таъминлаш мақсадида “бир дарча” тамойили орқали нуфузли давлат органлари ва ташкилотлари билан ҳамкорликда рақамли экотизим яратиш бўйича фаол иш олиб бормоқда”, — деди “Атамекен” Миллий тадбиркорлар палатаси раиси Раимбек Баталов Астанада ШҲТга аъзо давлатлар вакиллари иштирокида бўлиб ўтган ишбилармонлик кенгаши йиғилишида.
Шунингдек, палата раҳбари рақамли интерактив инвестиция харитаси ишлаб чиқилганини таъкидлади.
“Интерактив харита, биринчи навбатда, жойларда инвестиция лойиҳалари амалга оширилишини янада холисона кузатиш имконини беради. Иккинчидан, ҳудудларда ва умуман мамлакатда кичик ва ўрта бизнесни ривожлантиришнинг асосий кўрсаткичлари мониторингидир. Бундан ташқари, ушбу харита инвесторлар ва сармоявий таклифлар ҳақидаги маълумотларни бирлаштирган ноёб маълумотлар базасидир. Харита потенциал инвесторларга Қозоғистондаги имкониятлар ва лойиҳалар, шунингдек, бизнес шароитлари ҳақида батафсил маълумот олиш имконини беради. ШҲТ ишбилармонлар кенгашининг ҳурматли аъзолари ва бизнес вакилларини ушбу платформада иштирок этишга таклиф қиламан”, - деди у.
Аввал хабар берганимиздек, Қозоғистоннинг ШҲТ давлатлари билан товар айирбошлаш ҳажми 66 миллиард долларга етди.
Бундан ташқари, ўтган йили Қозоғистонга ШҲТ давлатларидан 4,6 миллиард АҚШ доллари миқдорида инвестициялар жалб қилинган.
Эслатиб ўтамиз, ШҲТ давлатларининг қўшма муҳандислик хабини яратиш таклиф қилинган эди.