Қозоғистонда саратон текширувидан кимлар бепул ўтиши мумкин

ASTANА. Кazinform — Қозоғистонликлар саратон касаллиги бўйича бепул скрининг текширувидан ўтади. Бундай текширув беморнинг рўйхатга олинган жойидаги бирламчи тиббий-санитария ёрдами ташкилотларида ўтказилади. Соғлиқни сақлаш вазирлиги кимлар саратон скринингидан бепул ўтиши мумкинлигини маълум қилди.

— Кўкрак бези саратонини эрта аниқлаш учун: кўкрак бези саратони бўйича динамик кузатувда бўлмаган 40, 42, 44, 46, 48, 50, 52, 54, 56, 58, 60, 62, 64, 66, 68, 70 ёшли аёллар; Бачадон бўйни саратонини эрта аниқлаш учун: бачадон бўйни саратони бўйича динамик кузатувда бўлмаган 30, 34, 38, 42, 46, 50, 54, 58, 62, 66, 70 ёшли аёллар;

Йўғон ичак саратонини эрта аниқлаш учун: йўғон ичакнинг хавфсиз ва хавфли ўсмалари динамик кузатувида бўлмаган 50, 52, 54, 56, 58, 60, 62, 64, 66, 68, 70 ёшли эркаклар ва аёллар ундан ўтиши мумкин, — дейди вазирлик мутахассислари.

Бундай текширувлар юқорида қайд этилган саратон турлари бўйича динамик кузатувда бўлмаган мажбурий ижтимоий тиббий суғурта тизими бўйича суғурталанган фуқаролар учун ўтказилади. Бирламчи соғлиқни сақлаш ташкилотлари беморга қўнғироқ қилиш ёки SМS юбориш орқали скрининг зарурати ҳақида хабар беради. Бундан ташқари, мутахассислар хонадонларга бориб, аҳолига хабар беради.

— Скрининг доирасида касаллик диагностикаси ташхисни морфологик текшириш даражасигача олиб борилади ва касаллик даражасини аниқлаш учун қўшимча текширув талаб этилади. Преканцероз жараёнлар аниқланса, беморлар онколог билан маслаҳатлашишлари мумкин. Айни пайтда вилоят онкология марказлари негизида эксперт эндоскопия марказлари ташкил этилган. Улар йўғон ичак саратони скринингидан ўтаётган беморлар орасида нафақат диагностик эндоскопик текширувлар ўтказади, балки реабилитациядан ўтади ва динамик кузатувга олинади, дея — хабар беради Соғлиқни сақлаш вазирлиги.

Айтиш жоизки, скрининг ҳозирда ижтимоий суғурта муассасаси томонидан молиялаштирилади. Идора вакиллари саратон скринингини аҳолига кўрсатиладиган бепул тиббий хизматлар қаторига киритишни режалаштираётганликларини маълум қилди. Қонунчилик ҳужжати қабул қилинса, ушбу турдаги кўриклар ҳатто мажбурий ижтимоий тиббий суғурта тизимида суғурта қилинмаган фуқароларга ҳам бепул тақдим этилади.

Эслатиб ўтамиз, аввалроқ Қозоғистоннинг саратонга қарши дориси қачон чиқарилиши ҳақида хабар берган эдик.