Қозоғистонда 752 нафар захирадаги зобит икки йил муддатга ҳарбий хизматга чақирилади

Ashyq норматив-ҳуқуқий ҳужжатлар порталида захирадаги зобитларни ҳарбий хизматга чақириш тўғрисидаги Ҳукумат қарори лойиҳаси эълон қилинди, деб хабар беради Kazinform.

Қозоғистон Республикасининг 2012 йил 16 февралдаги “Ҳарбий хизмат ва ҳарбий хизматчиларнинг мақоми тўғрисида”ги Қонунининг 32-моддасига мувофиқ чиқарилган Ҳукумат қарорига кўра, зобитлар таркибида ҳарбий хизматни ўташ учун захирадаги ҳарбий хизматга яроқли ва муддатли ҳарбий хизматни ўтамаган зобитлар қонун ҳужжатларида белгиланган тартибда 2024 йилда йигирма тўрт ой муддатга ҳарбий хизматга жўнатилади.

Қарор иловасида 600 нафар зобит мамлакат Қуролли Кучлари сафига, 80 нафари Миллий хавфсизлик қўмитасининг Чегара хизматига, 42 нафари Ички ишлар вазирлиги Миллий гвардиясига, Фавқулодда вазиятлар вазирлигига 30 нафар, жами 752 нафар зобит муддатли ҳарбий хизматга чақирилиши белгиланган.

Ҳужжат 2023 йил 6 декабргача жамоатчилик муҳокамаси учун тақдим этилади.