Қозоғистон жаҳон ОАВларида: Корея ва Ўзбекистон билан алоқалар, шакар заводи ва экспорт
Июль ойи ўрталаридан ўтар экан, узоқ ва яқин хориждаги оммавий ахборот воситаларида Қозоғистон билан боғлиқ кўплаб янгиликлар эълон қилинди. Улар орасида мамлакатнинг Жанубий Корея ва Ўзбекистон билан алоқалари изчил ривожланиб бораётгани, Туркия гиганти Қозоғистонда шакарни қайта ишлаш заводи қуриш лойиҳасини кўриб чиқаётганини алоҳида таъкидлаш жоиз. Бундан ташқари, баъзи мамлакатлар билан экспорт кўрсаткичларининг пасайиши ҳақида хабарлар бор. Батафсил Каzinform шарҳида ўқиш мумкин.
Аnadolu: Қозоғистон ва Жанубий Корея алоқаларни мустаҳкамлаш ниятида
23 июль куни Қозоғистон Президенти Қасим-Жомарт Тоқаев ва Корея Республикаси Президенти Ли Чжэ Мён телефон орқали мулоқот қилди. Бу ҳақда Туркиянинг Аnadolu нашри Ақордага таяниб хабар берди.
Суҳбат чоғида икки давлат раҳбарлари кўп қиррали Қозоғистон-Корея муносабатларини янада мустаҳкамлаш тарафдори эканликларини билдирдилар. Икки томонлама ҳамкорликнинг кенг кўламли йўналишлари бўйича ҳар томонлама фикр алмашилди.
Томонлар савдо-иқтисодий ва маданий-гуманитар соҳаларда ҳамкорликни фаоллаштиришдан манфаатдор. Шунингдек, саноат, энергетика, автомобилсозлик, таълим, тиббиёт каби соҳаларда жорий ва истиқболли лойиҳаларни самарали амалга ошириш муҳимлиги таъкидланди.
Президент Ли Чжэ Мён Қозоғистон Президентини Корея Республикасига расмий ташриф билан келишга таклиф қилди.
Қасим-Жомарт Тоқаев Жанубий Корея раҳбарининг таклифини миннатдорчилик билан қабул қилди ва 2026 йилда Сеулда бўлиб ўтадиган “Марказий Осиё – Корея Республикаси” саммитида иштирок этишга тайёрлигини билдирди.
Report: Туркия компанияси Қозоғистонда шакар заводи қуради
Туркиянинг йирик саноат холдингларидан бири бўлган Safi Holding Қозоғистонда юқори технологияли шакар заводи қуриш имкониятини кўриб чиқмоқда. Бу ҳақда Озарбайжон Report агентлиги мамлакат Қишлоқ хўжалиги вазирлигига таяниб хабар берди.
Бу масала вазир Айдарбек Сапаров ва Safi Holding бош директори Сафи Атакан ўртасидаги учрашувда муҳокама қилинди.
Лойиҳанинг умумий инвестиция ҳажми 150-200 миллион долларни ташкил этади. Маълум қилинишича, бўлажак корхонанинг режалаштирилган қуввати йилига 140 минг тонна шакарни ташкил этади. Бунинг учун 1 миллион тоннага яқин қанд лавлаги қайта ишланади.
Айни пайтда завод қурилиши учун қулай ҳудуд танлаш ишлари олиб борилмоқда. Бу ерда экин майдонларининг мавжудлиги ва инфратузилманинг ривожланиши асосий мезон ҳисобланади. Вазирлик лойиҳани ҳар томонлама қўллаб-қувватлашга, жумладан, давлат томонидан қўллаб-қувватлаш чораларини кўришга тайёрлигини қайд этди.
UzA: Қозоғистон ва Ўзбекистон ҳудудлараро алоқаларни янги босқичга кўтармоқда
Ўзбекистоннинг Қозоғистондаги Фавқулодда ва Мухтор Элчиси Бахтиёр Ибрагимов бошчилигидаги дипломатик миссия делегацияси амалий ташриф билан Шарқий Қозоғистон вилоятида бўлди. Ташриф доирасида делегация Шарқий Қозоғистон вилояти ҳокими Нуримбет Сақтағанов билан учрашди, деб хабар беради UzA.
Қозоғистон томони ҳудуднинг иқтисодий ва сармоявий салоҳиятини тақдим этди ва Ўзбекистон билан савдо-иқтисодий алоқаларни ривожлантиришдан манфаатдорлигини билдирди.
Ташриф чоғида Ўзбекистон дипломатлари ҳудудда яшовчи Ўзбекистон фуқаролари билан ҳам учрашди. Учрашувда Ўзбекистонда амалга оширилаётган ижтимоий-иқтисодий ислоҳотлар, хориждаги ватандошларни қўллаб-қувватлашга қаратилган чора-тадбирлар ҳақида кенг маълумот берилди. Бундан ташқари, консуллик ва ҳуқуқий масалалар бўйича тегишли маслаҳатлар берилди, Қозоғистоннинг миграция қонунчилигига қатъий риоя қилиш зарурлиги таъкидланди.
Ташриф доирасида Ўзбекистон элчихонаси делегацияси Шарқий Қозоғистон вилояти ҳокимлиги томонидан ташкил этилган ҳудудий инвестиция форумида ҳам иштирок этди.
Форумда Қозоғистон томони биргаликда амалга оширишга тайёр бўлган бир қатор истиқболли лойиҳаларни тақдим этди. Бундан ташқари, Ўзбекистон делегацияси 2025 йил сентябрь ойида бўлиб ўтадиган «Altai Invest-2025» инвестиция форумида иштирок этишга таклиф қилинди.
Дипломатик миссия доирасида элчихона вакиллари Даулет Серикбаев номидаги Шарқий Қозоғистон техника университетига ташриф буюриб, талабалар билан учрашди. Университет жамоаси тиббиёт, қишлоқ хўжалиги, металлургия ва ишлаб чиқариш соҳаларида илмий лойиҳаларни тақдим этди ва инновацион ғоялар билан ўртоқлашди.
Умуман олганда, мазкур ташриф Ўзбекистон ва Қозоғистон ўртасидаги ҳудудлараро ҳамкорликни чуқурлаштириш, реал сармоявий, ишлаб чиқариш ва ижтимоий-гуманитар лойиҳаларни амалга оширишга янги суръат бағишлагани таъкидланди.
Тrend: Қозоғистондан Эронга етказиб берилаётган товарлар ҳажми камайди
Эрон жорий йилнинг дастлабки уч ойида, аниқроғи, 2025 йилнинг 21 мартидан 21 июнига қадар Қозоғистондан маҳсулот импорти ўтган йилнинг шу даврига нисбатан камайганини маълум қилди. Кўрсаткичларнинг камайиши қиймат бўйича 58,1 фоизни, оғирлиги бўйича эса 47,2 фоизни ташкил этади. Бу ҳақда Эрон божхона бошқармаси маълумотларига таяниб, Озарбайжоннинг Тrend агентлиги хабар берди.
Бу даврда Қозоғистондан Эронга етказиб берилган маҳсулотлар қиймати тахминан 8,69 миллион долларни ташкил этиб, умумий оғирлиги 27,5 минг тоннани ташкил этди. Таққослаш учун, ўтган йилнинг шу уч ойида импорт ҳажми 20,8 миллион долларни, товар оғирлиги эса 52,2 минг тоннага етган.
Қозоғистондан Эронга энг кўп экспорт қилинадиган маҳсулотлар буғдой, арпа, турли жиҳозлар ва бошқа маҳсулотлар бўлди.
Эрон ва Қозоғистон ўртасидаги умумий товар айланмаси ушбу уч ойда 60,7 миллион долларни (123 минг тонна) ташкил этди. Ўтган йилга нисбатан қиймати бўйича 27,7 фоизга, оғирлиги бўйича 25,3 фоизга камдир.
Умуман олганда, уч ойда Эрон нефть маҳсулотларини ҳисобга олмаганда жами 9 миллион тонна маҳсулот импорт қилди. Нархи 13 миллиард долларни ташкил этди. Шу билан бирга, нонефт маҳсулотлари импорти қиймати бўйича 11,7 фоизга, оғирлик бўйича эса 4,35 фоизга камайди.
Бунинг сабаби, Эрон расмийлари фақат зарурий товарларни импорт қилишга устувор аҳамият беришда ва маҳаллий ишлаб чиқарилган маҳсулотларни импорт қилишни чеклашда давом этмоқда.