Қозоғистон ва Тожикистон янги қўшма корхоналар ташкил этади

ASTANA. Kazinform – Қозоғистон ва Тожикистон сармоявий лойиҳаларни кенгайтириш ва қўшма корхоналар ташкил этиш орқали иқтисодий ҳамкорликни мустаҳкамламоқда.

“Ўтган йилги энг юқори даражадаги келишувларга мувофиқ, аниқ натижалар мавжуд. Хусусан, Қозоғистон ҳудудида кунгабоқар уруғини қайта ишлаш бўйича қўшма корхона ташкил этиш ва ишлаб чиқарилган ўсимлик ёғини кейинчалик Тожикистонга экспорт қилиш масаласи кўриб чиқилмоқда”, – деди Тожикистон Ташқи ишлар вазири Сирожиддин Мухриддин Астанада ҚР Бош вазири ўринбосари – Ташқи ишлар вазири Мурат Нуртлеу билан учрашув якунлари бўйича.

Савдо ҳамкорликнинг асосий йўналишларидан бири бўлиб қолмоқда. 2024 йилда Қозоғистон Астана, Павлодар, Чимкент, Кўкшетау ва Қостанайда Тожикистон маҳсулотлари кўргазмаларини ўтказди ва бу экспорт ҳажмининг ошишига хизмат қилди. Тожикистонда мева-сабзавот маҳсулотларини экспортга тайёрлаш учун қўшма логистика маркази ҳам ташкил этилмоқда.

Томонлар сармоявий соҳада фаол ҳамкорликни давом эттиришга ва Қозоғистон компаниялари фаолиятини қўллаб-қувватлашга тайёр эканликларини билдирдилар. Айтганча, Тожикистонда турли профилдаги 100 га яқин қозоқ компаниялари фаол ишламоқда.

Қозоғистон ва Тожикистон ўртасидаги ўзаро товар айирбошлаш ҳажми 1,2 миллиард долларга етди ва 2024 йилда 7 фоизга ўсди. Улар товар айирбошлаш ҳажмини 2 миллиард доллардан ортиқроққа етказмоқчи.