Қозоғистон МОҚ ва Халқаро олимпия қўмитаси ҳамкорликни кучайтиради
ASTANА. Kazinform - Қозоғистон Миллий олимпия қўмитаси президенти Геннадий Головкин, Қозоғистон Республикаси Туризм ва спорт вазири Ербол Мирзабосинов ва Халқаро олимпия қўмитасининг спорт бўйича директори Кит МакКоннелл бўлажак Олимпия ўйинларига тайёргарлик кўриш ва икки томонлама ҳамкорликни мустаҳкамлаш бўйича музокараларда иштирок этди. Бу ҳақда қўмита матбуот хизмати хабар берди.
2026 йилда Милан ва Кортинада ўтказиладиган қишки Олимпия ўйинлари, 2028 йилда Лос-Анжелесда бўлиб ўтадиган ёзги Олимпиада ўйинлари, 2025 йилда Ар-Риёдда бўлиб ўтадиган Олимпия ўйинлари доирасидаги илк киберспорт мусобақаси, 2025 йилда Дакарда бўлиб ўтадиган ўсмирлар Олимпиадаси учрашувнинг асосий мавзуларидан бўлди. Музокаралар давомида мусобақалар дастури, транспорт-логистика таъминоти, маданий-маърифий тадбирлар каби муҳим масалалар муҳокама қилинди.
Томонлар халқаро тадбирларни юқори савияда ташкил этишни таъминлашда ҳамкорликда иш олиб бориш ва тажриба алмашиш муҳимлигини таъкидладилар.
ХОҚнинг спорт ишлари бўйича директори Кит МакКоннелл Қозоғистоннинг халқаро ҳамкорликни мустаҳкамлаш борасидаги саъй-ҳаракатларини юқори баҳолади ва Геннадий Головкиннинг World Boxing Олимпия комиссияси раиси сифатида боксни Олимпия ўйинлари дастурида сақлаб қолиш жараёнига қўшган ҳиссасини алоҳида таъкидлади. Қозоғистон МОҚ раҳбари Халқаро олимпия қўмитаси билан ҳамкорликни кучайтиришга тайёрлигини билдирди.
– Олимпия ўйинларига тайёргарлик мураккаб ва масъулиятли вазифадир. Қозоғистон Халқаро олимпия қўмитаси билан фаол музокаралар олиб бораётганидан мамнунмиз. Биз ХОҚ вакилларининг ушбу ташрифини икки томонлама ҳамкорликни мустаҳкамлаш йўлидаги муҳим қадам, деб биламиз. Қозоғистон спортни ривожлантириш ва Олимпия ҳаракатини қўллаб-қувватлашга қаратилган музокаралар ва қўшма ишларга доим тайёр, – деди Геннадий Головкин.
Учрашув иштирокчилари спортчиларни қўллаб-қувватлаш, олимпия спорт турларини ривожлантириш, олимпия қадриятларини тарғиб қилишга қаратилган қўшма лойиҳаларни амалга ошириш истиқболларини муҳокама қилди.
Музокаралардан ташқари, ХОҚ делегацияси Астананинг асосий спорт иншоотлари, жумладан, “Барс Арена” муз саройи, Қозоғистон енгил атлетика мажмуаси, Жақсилиқ Ушкемпиров номидаги жанг санъатлари саройига ташриф буюрди. Халқаро меҳмонлар инфратузилманинг юқори сифати ва жаҳон стандартларига мослигини алоҳида таъкидладилар.