Корея ва Марказий Осиё давлатлари ҳамкорликнинг янги йўлини топишга интилмоқда – Юн Сок Ёль

ASTANA. Kazinform – Корея Республикаси ва Марказий Осиё давлатлари ҳамкорликнинг янги йўлини излашга интилмоқда. Бу ҳақда Жанубий Корея президенти Юн Сок Ёль Ақордада ҚР Президенти Қасим-Жомарт Тоқаев билан учрашувда айтиб ўтди.

Ўз навбатида Юн Сок Ель Қозоғистон Президенти билан ўтган йилнинг сентябрь ойида Нью-Йоркда илк бор учрашганини эслади ва Астанада яна учрашганидан хурсанд эканлигини таъкидлади.

“Бу йил биз Корея Республикаси ва Қозоғистон ўртасидаги стратегик шерикликнинг 15 йиллигини нишонлаймиз. Шунинг учун ҳам биз ушбу давлат ташрифига алоҳида эътибор қаратмоқдамиз. 1992-йилда Корея Республикаси билан Қозоғистон ўртасида дипломатик муносабатлар ўрнатилганидан буён ўтган 32 йил давомида икки томонлама муносабатлар сезиларли даражада ривожланди. Бугунги кунда Кореянинг кўплаб компаниялари Қозоғистон бозорида муваффақиятли фаолият юритиб, иқтисодиёт, саноатни ривожлантириш, давлат инфратузилмасини кенгайтиришга ўз ҳиссасини қўшмоқда. Бундан ташқари, биз икки мамлакат ўртасидаги ҳамкорлик уфқларини, жумладан, энг муҳим минерал-хомашё ресурслари, энергетика, гуманитар ва маданий алмашинувларни кенгайтирмоқдамиз. Экология, тиббиёт, таълим соҳаларида ҳамкорлик ҳар куни жадал ривожланмоқда”, – деди Корея Президенти.

Юн Сок Ёль Марказий Осиёга ташрифи арафасида Корея Республикаси ҳукумати Кореянинг БМТ мамлакатларига нисбатан биринчи дипломатик стратегиясини эълон қилганини таъкидлади. Стратегия “Корея Республикаси – Марказий Осиё ҳамкорлик ташаббуси” деб аталади.

“Ушбу ташаббус ҳамкорликнинг 3 тамойилини ўз ичига олади: шериклик, бирлик ва бунёдкорлик. Кореянинг илғор технологиялари ва рақамли имкониятларига таянган ҳолда, Корея Республикаси ва Марказий Осиё давлатлари ҳамкорликнинг янги йўлини топишга интилади”, – деди Юн Сок Ёль.