Клублар ўртасидаги ЖЧ: «Пари Сен-Жермен» ва «Челси» финалда тўқнашади

ASTANA. Kazinform – Франциянинг «Пари Сен-Жермен» жамоаси футбол бўйича клублар ўртасидаги жаҳон чемпионати финалига чиқиш учун бериладиган иккинчи йўлланмани қўлга киритди.

Франциялик клуб ярим финалда Испаниянинг «Реал Мадрид» жамоасига қарши майдонга тушди. Ўйин бошидан фаол ҳаракат қилган «ПСЖ» ҳужумга жиддий эътибор қаратди. Испаниялик ҳимоячилар эса кўп хатоларга йўл қўйиб, рақиб ҳужумларига тўсқинлик қила олмади.

6-дақиқада Фабиан Руис ҳисобни очди, 9-дақиқада Усман Дембеле иккинчи голни урди. 27-дақиқада яна Фабиан Руис тўпни дарвозага йўллади, 87-дақиқада эса Гонсалу Рамуш охирги голни киритиб, ўйинга нуқта қўйди.

Шу тариқа, «Пари Сен-Жермен» «Реал Мадрид»ни 4:0 ҳисобида мағлуб этиб, финалга йўл олди.

Энди улар 13 июль куни Англиянинг «Челси» клубига қарши финалда бош соврин учун кураш олиб борадилар.

Жаҳон чемпионатидаги соврин жамғармаси – 1 миллиард АҚШ долларини ташкил этади. Чемпионликни қўлга киритган жамоа 125 миллион доллар мукофот олади. Қолган маблағ 32 та жамоа орасида эгаллаган ўрнига қараб тақсимланади.

Opta суперкомпьютери 2025 йилги жаҳон чемпионатида қайси жамоа ғолиб чиқиш эҳтимоли юқори эканини ҳисоблаб чиқди. Ушбу таҳлил учун 10 мингта сценарий асосида ҳисоб-китоб амалга оширилган.

Прогнозга кўра, чемпионатнинг асосий фаворити сифатида Франциянинг «Пари Сен-Жермен» жамоаси кўрсатилмоқда – уларнинг ғалаба қозониш эҳтимоли 18,5% деб баҳоланган.