Қирғизистонда ёлғон маълумот тарқатганлар жаримага тортилади

BISHKEK. Kazinform - Мамлакат ҳукумати оммавий ахборот воситалари ва ижтимоий тармоқларда ёлғон маълумотларни эълон қилганлик учун жавобгарликни назарда тутувчи Жиноят кодексига ўзгартишлар киритиш ташаббуси билан чиқди, деб хабар беради Kazinform мухбири.

Қонун лойиҳаси кўриб чиқиш учун Жогорку Кенешга юборилди.

Ишлаб чиқувчилар таъкидлаганидек, бугунги кунда интернет ва ижтимоий тармоқлар асосий ахборот манбаига айланган, уларнинг платформаларида ҳам ёлғон маълумотлар тарқатилмоқда. Оммавий ахборот воситалари ва интернет маконини тартибга солишни цензура ёки демократик ҳуқуқ ва эркинликларнинг бузилиши деб ҳисобламаслик керак. Фейк аккаунтлар вазиятни беқарорлаштириш, шунингдек, ҳар қандай воқеадан кейин жамиятда салбий кайфият яратиш мақсадида рўйхатга олинади.

Ҳужжатга кўра, ижтимоий тармоқлар ва оммавий ахборот воситаларида жамоат тартибини, фуқаролар ёки ташкилотларнинг ҳуқуқ ва қонуний манфаатларини ёхуд жамият ёки давлатнинг қонун билан қўриқланадиган манфаатларини бузишга сабаб бўладиган сохта маълумотларни эълон қилганлик учун, агар ушбу ҳаракатлар жиноий жавобгарликка сабаб бўлмаса, жарима солиш таклиф этилмоқда.

Жарима жисмоний шахслар учун 200 ҳисобланган кўрсаткич (20 минг сом), юридик шахслар учун 650 ҳисобланган кўрсаткич (65 минг сом) миқдорида белгиланди. Мазкур ҳуқуқбузарлик тўғрисидаги баённомани тузиш бўйича ваколатли орган этиб республика Ички ишлар вазирлиги белгиланиши тавсия этилган.