Қирғизистонда сўз эркинлигини чеклаб бўлмайди - Садир Жапаров

BISHKEK. Kazinform - Қирғизистонда сўз эркинлигини чеклаб бўлмайди, халқ бунга йўл қўймайди. Бу ҳақда Қирғизистон президенти Садир Жапаров “Кабар” ахборот агентлигига берган интервьюсида маълум қилди, дея хабар беради Kazinform мухбири.

Давлат раҳбари халқаро ва жамоат ташкилотларининг Қирғизистонда сўз эркинлиги билан боғлиқ вазиятнинг ёмонлашувига доир рейтингларига изоҳ берар экан, қирғиз халқи азалдан сўз эркинлиги тарафдори бўлиб келганини таъкидлади.

- Вазият ёмонлашганини таъкидлаётганларнинг ўзлари вазиятни беқарорлаштиришдан манфаатдор. "Сўз эркинлиги" атамаси орқасида ҳар томонлама яшириниб, улар хоҳлаган нарсани қилишади. Булар "сохта ватанпарварлар"дир. Халқ ўртасида танқидий фикрлашни ривожлантиришга қаратилган тарғибот-ташвиқот ишлари фаол олиб борилмоқда. Бу давлатчилигимизга, менталитетимизга, урф-одатларимизга зиддир. Ёлғон маълумотлар тарқалмоқда, кимгадир туҳмат қилишга уринишлар кўпайган. Вазиятни издан чиқаришга қаратилган худбин мақсадларнинг ҳақиқатга айланишига йўл қўймаймиз. Буни ким қилаётганини халқ жуда яхши билади ва тушунади. Агар ҳукумат сўз эркинлигига ноҳақ тажовуз қилганида, халқ аллақачон кўтарилган бўларди, - дея изоҳ берди президент.

Садир Жапаров Қирғизистонда инсон ҳуқуқлари тўлиқ ҳурмат қилинишига ишонтирди.

— Шу билан бирга, камчиликлар ҳам бор. Бу инсон омили туфайли содир бўлмоқда, бироқ айни пайтда биз бундай ҳолатларга зудлик билан жавоб беришга, фуқароларнинг қонуний ҳуқуқларини ҳимоя қилишга ҳаракат қиламиз.

Биздаги демократия ҳатто бизни қоралайдиган давлатларда ҳам мавжуд эмас. Афсуски, баъзи фуқаролар "демократия" тушунчасидан бутунлай бошқа йўналишда фойдаланишга ҳаракат қилмоқдалар. Демократия ниқоби остида ёлғон маълумотлар тарқатиб, тартибсизликка чақирмоқдалар. Баъзи ахборот сайтлари маълумотларнинг ишончлилигига ишонч ҳосил қилмасдан ва текширув ўтказмасдан, уларни ҳақиқат сифатида кўрсатиб, ёлғонларни эълон қилишади. Умуман олганда, мамлакатда бундай ҳолатлар кўп. Шунинг учун биз тўғри демократик тамойиллар асосида яшашни ўрганишимиз керак, - деди у.

Унинг фикрича, демократия ва сўз эркинлиги бўйича жаҳон рейтингини сўз эркинлиги орқасига яширинганлар тузади.

– Агар биз уларнинг шартларига рози бўлганимизда, табиатимизга зид зарарли сиёсатларини сингдирганимизда, сўз эркинлиги, инсон ҳуқуқларини ҳимоя қилиш бўйича рейтингда биринчи ўринларга чиққан бўлардик. Бизга вақт ўтиши билан давлатни маънавий жиҳатдан бузадиган раҳбар керак эмас, - деди Садир Жапаров.

Аввалроқ Садир Жапаров “Кабар” ахборот агентлигига берган интервьюсида мамлакатда ҳокимиятни зўравонлик билан алмаштириш учун ҳеч қандай асос йўқлигини айтган эди.

Муаллиф: Гулмира Абдраҳманова