Қирғизистон ва Тожикистон яна 38 километрлик чегара бўйича келишиб олди

BISHKEK. Kazinform - Қирғизистон Вазирлар кабинети матбуот хизматининг маълум қилишича, Топографик ишчи гуруҳлар Қирғизистон-Тожикистон давлат чегарасининг 38,35 километри бўйича келишиб олди, деб хабар беради Kazinform.

“10-16 январь кунлари Қирғизистон Республикасининг Боткен вилояти Боткен шаҳрида Қирғизистон Республикаси ва Тожикистон Республикаси Ҳукумат делегацияларининг ҳуқуқий масалалар бўйича топографик ишчи гуруҳлари ва ишчи гуруҳларининг Қирғизистон-Тожикистон давлат чегарасини делимитация ва демаркация қилиш бўйича навбатдаги йиғилиши бўлиб ўтди”, — дейилади хабарда.

Топографик ишчи гуруҳлар Қирғизистон-Тожикистон давлат чегарасининг 38,35 километри бўйича келишиб олдилар.

Томонлар Тожикистон Республикаси ҳудудида бўлиб ўтадиган навбатдаги учрашувда қолган ҳудудларни тавсифлаш устида ишлашни давом эттирадилар.

Эслатиб ўтамиз, Тожикистон ва Қирғизистон умумий чегараси 970 кмни ташкил қилади. Айни пайтда, чегара чизиғининг бир неча юз километрлари ҳали аниқланмаган ёки белгиланмаган. Томонларнинг учрашувлари бир-бирининг ҳудудида навбатма-навбат ўтказилади.

Декабрь ойида Қирғизистон ва Тожикистон 47 километрдан ортиқ чегара бўйича келишиб олди. Кейинроқ яна 12 километрга яқин чегара келишиб олинди.

​