Хитойлик олимлар инсон юрагида микропластикларни топишди

ASTANА. Кazinform - Одатда озиқ-овқат қадоқлари ва бўёқларда учрайдиган микропластиклар инсон юраги тўқималарида топилди. Хитойнинг Пекиндаги Аньчжэнь касалхонаси олимлари гуруҳи юрак-қон томирига жарроҳлик амалиётини ўтказган 15 нафар беморнинг юрак тўқималарини текширгандан сўнг ваҳимали хулосага келди, дея хабар беради Кazinform New York Postга таяниб.

Тадқиқот Америка Кимё Жамияти томонидан нашр этилган.

Микропластиклар - бу кенглиги 5 миллиметрдан кам бўлган ёки қалам ўчиргичининг ўлчамидаги пластмасса зарралари. У инсон танасига оғиз, бурун ва бошқа тана бўшлиқлари орқали кириши мумкин.

Баёнотга кўра, шифокорлар Кун Хуа, Сюбин Ян ва уларнинг жамоаси бу зарралар билвосита ва тўғридан-тўғри таъсир қилиш орқали одамларнинг юрак-қон томир тизимига кириши мумкинлигини аниқламоқчи эди.

Шифокорлар беморларнинг юрак тўқималарини, шунингдек, иштирокчиларнинг ярмидан қон намуналарини тўплашди ва таҳлил қилишди.

Улар «кўпчилик тўқималар намуналарида ўндан мингтагача индивидуал микропластик заррачаларни топдилар». Микропластик зарралар барча қон намуналарида ҳам топилган.

Тўққиз турдаги пластмасса юрак тўқималарининг беш турида топилган. Тадқиқот шунингдек, жарроҳлик аралашувлар пайтида баъзи микропластик зарралар тана бўшлиғига кирганлиги ҳақида далилларни топди.

Юракнинг уч хил қисмида топилган микропластикларга полиметил метакрилат киради. Бу шишага зарбага чидамли муқобил сифатида кенг қўлланиладиган пластмасса.

Шунингдек, кийим-кечак ва озиқ-овқат идишларида ишлатиладиган полиэтилентерефталат ва дераза ромлари, дренаж қувурлари, бўёқлар ва бошқаларни ишлаб чиқаришда кенг қўлланиладиган поливинилхлорид (ПВХ) топилди.

«Тирик организмда микропластикларнинг топилиши ташвишли ҳолдир. Унинг юрак тўқималарига қандай кириб боришини, шунингдек, узоқ муддатда юрак жарроҳлигидан кейинги потенциал таъсирини ўрганиш учун кўпроқ тадқиқотлар талаб этилади «, - дея хулоса қилди тадқиқот гуруҳи.

Ўтган йили бир тадқиқот шуни кўрсатдики, одамлар ҳар ҳафта тахминан 5 грамм кичик пластик заррачаларни истеъмол қиладилар, бу тахминан кредит картасининг оғирлиги.

Вена тиббиёт университети олимлари пластик зарралар инсон озиқ-овқат занжирига қадоқлаш чиқиндиларидан кириб, денгиз тузи, денгиз маҳсулотлари ва ҳатто ичимлик суви орқали танага киришини аниқлади.

Микропластиклар туфайли ошқозон-ичак трактидаги ўзгаришлар семириш, диабет ва сурункали жигар касалликлари каби метаболик касалликлар билан боғлиқ.