Хитой-Қозоғистон чегарасида енгиллаштирилган божхона расмийлаштириш усули жорий этилди

ASTANA. Kazinform – Шинжон-Уйғур автоном районининг Тачэн округида жойлашган Бакту назорат-ўтказиш пунктда божхона расмийлаштиришнинг янги инновацион модели жорий этилди. Унга кўра, юклар чегарага етиб келганида қайта юклаш жараёнидан озод этилади, деб хабар берди Синьхуа.

«Синьцзян жибао» газетасининг ёзишича, мазкур модель корхоналарга юк жўнатилаётган жойда ёки ташиш жараёнида божхона органига декларация топшириш имконини беради. Шу орқали декларацияни текшириш ва хавфни таҳлил қилиш каби бир қатор жараёнлар олдиндан амалга оширилади. Натижада юк автомобили чегарадаги назорат ҳудудига етиб келганида божхона расмийлашувидан тезроқ ўтиши мумкин, бу эса сақлаш ва кутиш вақтини анча қисқартиради.

Бакту ўтказиш пунктида янги модель жорий этилганидан сўнг божхонадаги расмийлаштириш вақти 3-4 соатдан 10 дақиқагча қисқартирилиши мумкин.

“Янги тизим компанияларнинг харажатларини ҳам камайтиради”, – деди Шинжондаги савдо компанияларидан бири вакили Яо Фэй.

Урумчи божхонасининг маълум қилишича, жорий йилнинг дастлабки беш ойида Бакту орқали 292 минг тонна юк импорт ва экспорт қилинди. Бу ўтган йилнинг шу даврига нисбатан 3,7 фоизга кўп.

Мазкур модель Шинжонда биринчи марта 2023 йил ноябрида Алашанькоу ўтказиш пунктида синов тариқасида жорий этилган эди. Бу муваффақиятли тажрибага таянган ҳолда Урумчи божхонаси моделни Шинжондаги бошқа чегара пунктларига ҳам жорий этиш устида иш олиб бормоқда.