Хитой бу йил дон етиштириш ҳажмини 688 миллион тоннага етказади

PEKIN. Kazinform – Хитой ўз ғалла хавфсизлигини таъминлашга қодир. Чоршанба куни China Agricultural Outlook-2022 конференциясида қишлоқ хўжалиги соҳаси экспертлари шундай фикр билдиришди, дея хабар беради Kazinform СИНЬХУА агентлигига таяниб.

«Хитойда катта дон захиралари мавжуд, асосий қишлоқ хўжалиги маҳсулотларини етиштириш ва етказиб бериш барқарор», - деди конференцияда қишлоқ хўжалиги вазири ўринбосари Ма Юсян.

Шунингдек, у Хитой ташқи муҳитдаги ноаниқликларга дош бера олишига ишончи комил эканлигини қўшимча қилди.

Мамлакатда етти йил кетма-кет ғалла етиштириш 650 миллион тоннадан ошди, 2021 йилда эса аҳоли жон бошига дон етиштириш 483 килограммга етди, деди Ма Юсян, шунингдек, асосий қишлоқ хўжалиги маҳсулотлари, жумладан, гўшт, тухум, сут, балиқ ва бошқа маҳсулотлар захираси етарли эканлигини таъкидлади.

Конференцияда эълон қилинган Хитойнинг 2022-2031 йилларга мўлжалланган қишлоқ хўжалиги истиқболлари ҳисоботида келгуси 10 йил учун ишлаб чиқариш, истеъмол, савдо ва нарх тенденциялари прогноз қилинган ва мумкин бўлган ноаниқликлар таҳлил қилинган.

Хитойда ғалла етиштириш барқарор ўсишни давом эттириши ва 2022 йилда 688 миллион тоннага етиши кутилмоқда. Ҳисоботга кўра, кейинги ўн йилликда бу кўрсаткич ҳар йили 1,3 фоизга ошиб, 2031 йилда 762 миллион тоннага етади.

Ҳисоботда, шунингдек, ғалла етиштиришни кўпайтиришда фан-техника катта рол ўйнаши, прогноз даврида ғалладан олинадиган ҳосил 6,4 фоизга ошиши қайд этилган.

Ҳисоботга кўра, аксарият қишлоқ хўжалиги маҳсулотлари импортида пасайиш тенденцияси кузатилмоқда ва 2031 йилга бориб Хитойнинг ўзини дон билан таъминлаш даражаси 88,1 фоизгача ошади.