Грузияда полиция парламент биноси яқинида намойишчиларни тарқатиб юбормоқда

ASTANA. Kazinform – Махсус кучлар Грузия парламенти биноси яқинида намойишчиларни тарқатиб юбормоқда. Хавфсизлик кучлари кўздан ёш оқизувчи газ ишлатган, намойишчилар эса баррикадалар ўрнатган, деб хабар беради DW ахборот агентлиги.

Грузияда мамлакатни Европа интеграцияси курсига қайтариш талаби билан оммавий норозилик намойишлари кетма-кет олтинчи кун давом этмоқда.

Сешанба куни кечқурун махсус кучлар парламент биноси яқинида намойишчиларни тарқата бошлади.

Полиция намойишчиларни ҳибсга олиш учун кўздан ёш оқизувчи газ ишлатган, намойишчилар эса баррикадалар ўрнатган ва ўт қўйган. Айрим намойишчилар пиротехника воситаларидан фойдаланишмоқда.

Айни пайтда Грузия Ички ишлар вазирлиги айрим намойишчиларнинг ҳаракатлари “йиғилиш ва намойишлар тўғрисида”ги қонунда белгиланган чегарадан ошиб кетганини маълум қилди. Ички ишлар вазири ўринбосари Александр Дарахвелидзенинг сўзларига кўра, намойишлар чоғида “ноқонуний ҳаракатлар содир этган бир қанча агрессив гуруҳлар аниқланган”.

“Юқорида тилга олинган зўравонлик ва босқинчилик ҳаракатлари натижасида 143 нафар Ички ишлар вазирлиги ходими турли оғир тан жароҳатлари олди”, – дейди Дарахвелидзе.

Унга кўра, олти кунлик намойишлар давомида 293 нафар намойишчи ҳибсга олинди.

Ўз навбатида, грузиялик ҳуқуқ ҳимоячилари хавфсизлик кучларининг маҳбусларга нисбатан шафқатсиз муносабати ҳақида хабар беришади.

Бунгача биз Тбилисида норозилик намойишларининг 5-кунида содир бўлаётган воқеалар ҳақида ёзган эдик.