G7 давлатлари Марказий Осиёга 200 миллиард доллар сармоя киритмоқда

ASTANA. Kazinform – Қозоғистон Республикаси Ташқи ишлар вазири ўринбосари Назира Нурбаева АҚШнинг Глобал инфратузилма ва сармоявий ҳамкорлик дастури бўйича махсус координатори вазифасини бажарувчи Хелайна Матца билан учрашди, дея хабар беради Kazinform агентлиги ТИВга таяниб.

Учрашувда томонлар транспорт-логистика, тоза энергия ишлаб чиқариш, қишлоқ хўжалиги маҳсулотлари, ноёб тупроқ металларини қазиб олиш ва қайта ишлаш соҳаларидаги лойиҳаларга сармоя киритиш имкониятларини муҳокама қилдилар.

G7 глобал инфратузилма ва инвестицион ҳамкорлик дастури ривожланаётган мамлакатлардаги инфратузилма лойиҳалари учун 2027 йилгача 600 миллиард АҚШ доллари миқдорида сармоя киритишни мақсад қилган.

Музокаралар чоғида Н.Нурбаева Қозоғистонда транспорт инфратузилмасини, жумладан, Ақтау ва Қуриқ денгиз портлари орқали ривожлантириш истиқболлари, тоза энергия, муҳим минераллар ва қишлоқ хўжалиги маҳсулотларини ишлаб чиқариш соҳаларида лойиҳаларни амалга ошириш ҳақида гапирди. Вазир ўринбосари Марказий Осиё минтақаси ушбу соҳаларда узоқ муддатли шериклик учун катта салоҳиятга эга эканлигини таъкидлади ва Қозоғистон умумий мақсадларга эришиш йўлида АҚШ билан ҳамкорлик қилишга тайёрлигини билдирди.

Ўз навбатида, Х.Матца G7 давлатлари Марказий Осиёдаги инфратузилма лойиҳаларига 200 миллиард АҚШ долларигача сармоя киритишга тайёрлигини, Қозоғистон эса бундай лойиҳаларни амалга ошириш учун асосий йўналишлардан бири эканлигини таъкидлади. Дастурнинг асосий мақсади Европа бозорларига янада чиқиш имкониятига эга бўлган Марказий Осиё давлатлари ўртасидаги савдо алоқаларини кенгайтириш орқали дунёда озиқ-овқат ва энергетика хавфсизлигини таъминлаш учун етказиб бериш занжирини мустаҳкамлаш ва диверсификация қилишдан иборат.

Учрашув якунида томонлар муҳим инфратузилма лойиҳаларини амалга ошириш ва иқтисодий алоқаларни мустаҳкамлаш учун томонлар ўртасидаги ҳамкорликни ривожлантиришга келишиб олдилар.