Финландияда мактабда отишма юз берди, уч нафар ўсмир жароҳатланди

ASTANA. Kazinform – Финландиянинг жанубий қисмидаги мактабда рўй берган отишма натижасида камида уч нафар 12 ёшли ўқувчи жароҳат олди. Полиция гумондорни қўлга олган, деб хабар беради Report агентлиги Daily Mail нашрига таяниб.

Пирккала шаҳри полицияси маҳаллий вақт билан 10:42 да Виертола мактабида зўравонлик юз бергани ҳақида хабар олган ва воқеани бартараф этиш учун қуролланган ходимларни жўнатган.

“Жабрланганларнинг ҳаётига таҳдид йўқ. Гумондор қўлга олинди, унинг қуроли мусодара қилинди”, – дейилади полиция баёнотида.

Ҳуқуқни муҳофаза қилувчи органлар воқеа юзасидан тергов ишларини давом эттирмоқда.

Бунгача АҚШнинг Невада штати, Лас-Вегас шаҳридаги спорт залида содир бўлган отишмада икки киши ҳалок бўлгани ҳақида ёзган эдик.