Европа Иттифоқининг мудофаа харажатлари яқин 10 йил ичида 600 миллиард еврога етиши мумкин

Пайшанба куни Брюсселда Европа мудофаа агентлигининг йиллик конференцияси бўлиб ўтди, унда 300 га яқин делегат иштирок этди, деб хабар беради Кazinform мухбири.

Европа пойтахтига йиғилганлар орасида Европа мудофаа вазирлари, Европа Иттифоқи қонунчилари, Европа қуролли кучлари ҳарбий хизматчилари, мудофаа саноати вакиллари ва экспертлар бор эди.

Тадбирнинг очилишида сўзга чиққан Европа кенгаши президенти Шарль Мишель Европа Иттифоқи Европа мудофааси ва хавфсизлигига сармояларни молиялаштириш учун “Европа мудофаа облигациялари”ни яратиш масаласини кўриб чиқиши кераклигини таъкидлади.

- Европа Иттифоқига аъзо давлатлар мудофаа соҳасига сармоя киритишлари керак, бу эса келгуси 10 йил ичида 600 миллиард еврони ташкил қилиши мумкин, - дея Мишель конференцияда ўз харажатларини мувофиқлаштиришни яхшилашга чақирди.

Европа кенгаши раҳбари, шунингдек, компьютер тармоқлари орқали ҳужумларга қарши туриш учун ҳужум қилиш қобилиятига эга Европа кибер кучларини яратишни таклиф қилди.

- Биз Европа қитъамизни кучайтиришимиз керак. Биз Европа мудофаасини кучайтиришимиз даркор, - деди Ш.Мишель.

Европа кенгаши раҳбарининг айтишича, Европа мудофаа облигациялари, жумладан, хусусий инвесторлар учун жозибадор активлар синфига айланади. Мишель, шунингдек, кўпроқ ҳарбий сармоя ва фаолиятни Европа Иттифоқининг либерал демократик қадриятларини ҳимоя қилиш бўйича биргаликдаги саъй-ҳаракатларга йўналтириш вақти келганини айтди.

Муаллиф: Арнур Раҳимбеков