Европа араб саммитининг Ғазо бўйича қарорини қўллаб-қувватлади

ASTANA. Kazinform - Германия, Франция, Италия ва Буюк Британия ташқи ишлар вазирлари Араб давлатлари томонидан ишлаб чиқилган ва тўрт кун аввал Мисрда тақдим этилган Ғазо секторини қайта тиклаш режасини қўллаб-қувватлашини билдирди, деб хабар беради DW.

Араб давлатлари томонидан ишлаб чиқилган Ғазо секторини қайта тиклаш бўйича беш йиллик режа Европа томонидан қўллаб-қувватланди. Германия, Франция, Италия ва Буюк Британия ташқи ишлар вазирлари қўшма баёнотда ушбу режа минтақадаги икки миллионга яқин фаластинликларнинг оғир аҳволини тез ва узоқ муддатда яхшилашнинг реал йўлини таклиф қилишини таъкидлади. Бу ҳақда 8 март, шанба куни вазирлар баёнотига таяниб, dpa агентлиги хабар берди.

Вазирларнинг айтишича, бу режани амалга ошириш учун ҳам Исроил, ҳам Фаластин учун мақбул бўлган ва узоқ муддатли тинчлик ва хавфсизликни таъминлайдиган мустаҳкам пойдевор керак. Баёнот муаллифлари “барча томонларни ушбу режанинг афзалликларидан бошланғич нуқта сифатида фойдаланишга” чақирди ва 4 март куни Мисрда тақдим этилган ҳужжат “Фаластин маъмуриятининг марказий ролини аниқ қўллаб-қувватлашини” таъкидлади.

— Биз ХАМАС Ғазо секторини бошқармаслиги ва Исроилга таҳдид солмаслиги кераклигини тушунамиз, — дея таъкидлади Европанинг тўртта асосий давлати ташқи ишлар вазирлари.

Араб саммити Мисрнинг Ғазо сектори бўйича режасини қўллаб-қувватлади.

Араб давлатлари лигасининг фавқулодда саммити иштирокчилари Исроил билан урушда вайрон бўлган Ғазо секторини қайта тиклаш бўйича Миср режасини қўллаб-қувватлади. Бу режа фаластинликларни кўчиб ўтишга мажбурламасдан, 53 миллиард доллар (тахминан 50,5 миллиард евро) маблағ ажратишни назарда тутади.

4 март куни Қоҳирада бўлиб ўтган саммитдан сўнг Миср президенти Абдул Фаттоҳ ас-Сиси бу қарор қабул қилинганини маълум қилди. Ушбу беш йиллик режа АҚШ президенти Дональд Трамп илгари таклиф қилган “Яқин Шарқ риваераси” концепциясидан тубдан фарқ қилади. Трампнинг режаси Ғазо сектори аҳолисини “дўстона” араб мамлакатларига оммавий кўчиришни назарда тутган.

Миср президенти ўз нутқида АҚШ президентининг таклифи араб давлатлари вакиллари томонидан қаттиқ танқид қилинганига қарамай, Трамп минтақада тинч йўл билан келишувга ҳисса қўшишига ишонч билдирди.

— Ҳақиқий тинчлик Фаластин давлати тузилмагунча ўрнатилмайди. Тинчлик куч билан ўрнатилмайди ва унга мажбурлаш йўли билан эришилмайди, — деди ас-Сиси саммит очилишида.

Аввалроқ Дональд Трамп Оқ уйда Исроил бош вазири Биньямин Нетаньяхуни қабул қилиб, Қўшма Штатлар Ғазо сектори устидан назорат ўрнатиб, “хавфли портламаган бомба ва бошқа қуролларни йўқ қилиш учун масъул бўлишини” эълон қилган эди.

Трампнинг таклифи АҚШ ва бошқа давлатлар, жумладан, Германияда ҳам танқидга учради.

Кейинчалик Трампнинг Ғазо аҳолисини кўчириш ғояси Яқин Шарқда ҳам катта қаршиликларга дуч келди. Саудия Арабистони фаластинликларни Ғазо секторидан мажбуран чиқаришга уринишларни рад этди. Иордания подшоҳи Абдулла II унинг мамлакати саратон касаллигига чалинган 2000 нафар фаластинлик болани қабул қилишга тайёрлигини, бироқ АҚШ президентининг режасини умуман қўллаб-қувватламаслигини айтди. Миср эса фаластинликларни бошқа жойга кўчириш бўйича таклифларни қатъиян рад этиб, бу ҳаракат Фаластин масаласини “йўқ қилиш”га олиб келиши ва минтақа давлатларининг миллий хавфсизлигига таҳдид солиши мумкинлигини айтди.

Эслатиб ўтамиз, аввалроқ Трамп ХАМАСдан Ғазодаги барча исроиллик маҳбусларни озод қилишни талаб қилгани ҳақида хабар берган эдик.