Чимкентда маиший чиқиндиларни қайта ишлаш заводи қурилади

ASTANА. Кazinform - Испания, Хитой, Германия, Корея ва Туркия сармоядорлари томонидан Чимкент шаҳрида қаттиқ маиший чиқиндиларни саралаш, қайта ишлаш ва утилизация қилиш заводини қуриш бўйича таклифлар келиб тушди.

“Шаҳар ҳокимлигининг 2023 йил 13 январдаги 55-сонли қарори асосида қаттиқ маиший чиқиндилар полигони «Green line» чиқиндиларни қайта ишлаш заводи МЧЖ хусусий мулкидан давлат коммунал мулкига қайтарилди. Полигондаги 1,5 миллион тонна қисман кўмилган ва 250 минг тонна тасодифий сочилган чиқинди тўлиқ сараланди. Ҳозирда чиқиндихонани тўлдириш ҳисобига янги полигон қуриш учун 30 гектар ер майдони кўриб чиқилмоқда ва ҳужжатлар расмийлаштирилмоқда”, — дея Kazinform агентлиги юборган расмий саволга Чимкент шаҳар ҳокимлиги жавоб берди.

Маълумотларга кўра, қаттиқ маиший чиқиндиларни саралаш, қайта ишлаш ва утилизация қилиш заводини қуриш бўйича Испания, Хитой, Германия, Корея, Туркия инвесторларидан таклифлар келиб тушган.

“Ушбу давлатлар сармоядорлари билан учрашувда чиқиндиларни дастлабки саралаш шартлари белгиланиб, чиқиндиларнинг морфологик таркиби тақдим этилди. Ҳар бир хорижий инвестор чиқиндидан энергия ишлаб чиқариш жараёнида ишлаб чиқариладиган электр энергиясига қизиқиш билдиради. Аммо чиқиндилардан энергетик фойдаланиш жараёнида олинадиган электр энергияси учун қатъий белгиланган тариф йўқлиги сабабли ёқиш заводи қурилиши инвестор учун иқтисодий жиҳатдан фойдасиз”, — дейилади ҳокимлик ахборотида.

Экология кодексининг 324-моддасига асосан ваколатли орган (Экология ва табиий ресурслар вазирлиги) чиқиндиларни утилизация қилиш натижасида ишлаб чиқарилган электр энергиясининг энг юқори аукцион нархларини тасдиқлайди.

“Чиқиндиларни қайта ишлаш заводи қурилиши вазирлик томонидан чиқиндиларни утилизация қилиш учун фойдаланиладиган электр энергияси тарифи кўриб чиқилгандан сўнг амалга оширилади”, — дейилади саволга жавобда.