Бюджетга 135 миллиард тенге қайтарилди: Алихан Смаилов Президентга ҳисобот берди

ASTANA. Kazinform - Давлат раҳбари Олий Ҳисоб палатаси раиси Алихан Смаиловни қабул қилди, дея хабар беради Ақорда матбуот хизмати.

Қасим-Жомарт Тоқаевга Олий Ҳисоб палатасининг ўтган йилги фаолияти якунлари ва жорий йилги режа ҳақида маълумот берилди.

Президентга маълум қилиндики, ўтган йили 214 та объектда қиймати қарийб 11 триллион тенге бўлган 27 та аудиторлик тадбири ўтказилган. Натижада умумий қиймати 862 миллиард тенгега тенг турли меъёрлар бузилгани аниқланган. Текширувлар натижаларига кўра, 135 миллиард тенге бюджетга қайтарилган. Бу 2023 йилда тўланган суммадан беш баравар кўпдир.

Давлат раҳбарига қурилиш объектларининг нархларини шакллантириш, қайта ишлаш саноати лойиҳаларини молиялаштириш, қишлоқ хўжалигини субсидиялашда доимо камчиликлар борлиги таъкидланди.

Олий Ҳисоб палатаси томонидан аниқланган барча қонунбузарликларни бартараф этиш юзасидан Ҳукуматга тақдимнома киритилиб, масъул давлат органларига кўрсатмалар юборилди.

Алихан Смаиловнинг айтишича, жорий йилда 40 дан ортиқ аудиторлик тадбирлари режалаштирилган. Давлат раҳбарининг топшириғига биноан Астана ва Алмати шаҳарлари, Шимолий Қозоғистон, Қостанай ва Жамбил вилоятлари, шунингдек, “Самруқ-Қазна” жамғармаси, “Казатомпром” миллий компанияси, “KEGOC” корхонаси, Миллий банк, Фавқулодда вазиятлар вазирлиги бюджетлари ижроси текширилмоқда. Бундан ташқари, фан, мудофаа, ҳуқуқ-тартибот, спорт, ижтимоий таъминот, ўрмон хўжалиги соҳаларида аудитлар ўтказилади.

Йиғилиш якунида Президент давлат аудити тизимини такомиллаштириш бўйича ишларни давом эттириш бўйича топшириқлар берди. Шу билан бирга, у бюджет маблағларидан фойдаланишни самарали назорат қилиш учун замонавий рақамли ечимларни жорий этиш муҳимлигига эътибор қаратди.