Бразилия парранда гриппи туфайли Европа Иттифоқига гўшт экспорт қила олмайди

ASTANА. Кazinform — Дунёнинг энг йирик парранда гўшти экспортчиси энди Европа Иттифоқига парранда гўшти ва гўшт маҳсулотларини экспорт қила олмайди. Бунга мамлакатда парранда гриппи тарқалиши сабаб бўлмоқда, деб хабар беради АЗEРТАДЖ.

Бу ҳақда душанба куни Еврокомиссия маълум қилди. Аввалроқ, жума куни Бразилия паррандачилик фермасида грипп эпидемияси тасдиқлангани ҳақида хабар берган эди. Бу янгилик асосий импорт қилувчи давлат Хитой томонидан Бразилия билан савдони вақтинча тўхтатиб қўйишига ва Япония каби бошқа йирик бозорлар учун чекловларга олиб келди, деб ёзади Reuters.

— Европа Иттифоқига импорт талаблари экспорт қилувчи мамлакат (Бразилия) юқори патоген парранда гриппидан холи бўлишини талаб қилади, — дейилади Европа Комиссияси вакилининг электрон мактубида.

Бразилия Қишлоқ хўжалиги вазири Карлос Фаваро жума куни маълум қилдики, мавжуд протоколларга кўра, Хитой, Европа Иттифоқи ва Жанубий Корея Бразилиядан парранда гўшти импортини 60 кунгача тақиқлайди.

Бироқ, Европа Иттифоқи ушбу тақиқнинг аниқ муддатини аниқламади. Комиссия Бразилиянинг HPAIдан холи мақоми Рио Гранде-ду-Сул штатидаги паррандачилик фермасида аниқланган эпидемиядан кейин тўхтатилганини эълон қилди.

2024 йилда Бразилия 5 миллион тоннадан ортиқ парранда гўштини экспорт қилди, уларнинг тахминан 4,4 фоизи Европа Иттифоқига тўғри келди, дея хабар беради Бразилия ҳайвонлар оқсиллари ассоциацияси (ABPA).

Эслатиб ўтамиз, аввалроқ Бразилияда яшаган дунёдаги энг кекса аёл 116 ёшида вафот этгани ҳақида хабар берган эдик.