Балқаш кўлининг сатҳи йил бошидан буён 32 см га кўтарилди

ASTANА. Кazinform — 2025 йилнинг биринчи ярмида Балқаш кўли сатҳи ўртача 32 сантиметрга кўтарилди, деб хабар беради ҚР Сув ресурслари ва ирригация вазирлиги.

Аниқроғи, Болтиқбўйи тизими бўйича 341,55 метрдан 341,87 метргача. Йил бошидан буён Алмати вилоятидаги Қапшағай сув омборидан Балқаш кўлига 8,52 миллиард куб метр сув юборилган. Ўтган йили бу кўрсаткич шу даврда 8 миллиард куб метрни ташкил қилган эди. Жорий йилда Қапшағай сув омборидан кўлга жами 12 миллиард куб метр сув юбориш режалаштирилган.

Балқашдаги сув ҳажми асосан трансчегаравий Или дарёсига боғлиқ бўлиб, унинг оқими Қапшағай сув омбори томонидан тартибга солинади. Бу йил сув омбори кетма-кет иккинчи йил 100 фоизга тўлди. Эслатиб ўтамиз, ўтган йили ушбу объект 10 йил ичида биринчи марта 100 фоизга тўлган эди. Қапшағай сув омборининг тўлдирилгани Алмати вилоятидаги Оқдала ва Шенгелди суғориладиган майдонларини вегетация даврида сув билан тўлиқ таъминлаш имконини берди.

— Балқаш кўлини асраб-авайлашга алоҳида эътибор қаратилмоқда. Жорий йилда Франция илмий консорциуми билан ҳамкорликда ташкил этилган кўл ҳавзасини ўрганиш бўйича кенг кўламли дала экспедицияси ўтказилди. Франция мутахассислари билан ҳамкорликда олиб борилаётган ишлар Балқаш кўлини 2040 йилгача бўлган прогноз билан сақлаб қолишнинг бош режасини ишлаб чиқишга қаратилган. Бу ўтган йили Франция тараққиёт агентлиги ва геология-кон тадқиқотлари бюроси билан имзоланган уч томонлама шартнома доирасидаги ишлар, – деди ҚР Сув ресурслари ва ирригация вазири Нуржан Нуржигитов.

Эслатиб ўтамиз, жорий йилнинг апрель ойида Балқаш кўлида сув сатҳи 12 смга кўтарилгани ҳақида хабар берган эдик.