Австралияда қамоқхонадаги маҳбуслар сони рекорд даражага етди

ASTANА. Кazinform — Расмий маълумотларга кўра, Австралия қамоқхоналаридаги маҳбуслар сони тарихий рекорд ўрнатди ва бу кўрсаткич ҳамон ортиб бормоқда, деб хабар беради АЗЕРТАДЖ.

АBC News хабарига кўра, ҳозирда ҳибсда сақланаётганларнинг деярли ярми якуний суд томонидан ҳали ҳукм чиқарилмаган одамлардир.

Сўнгги йилларда Австралиянинг барча штатларида гаров тизимига ўзгартиришлар киритилди ва бу ислоҳотлар, айниқса, ёш жиноятчилар учун талабларни кучайтиришга қаратилган.

Австралия статистика бюросининг яқинда эълон қилинган маълумотларига кўра, сўнгги уч йил ичида қамоқдагилар сони барқарор равишда ўсиб бормоқда:

2022 йил март ойида — 40 330 киши,

Ҳозир — 46 081 киши.

Сўнгги чоракда тергов ҳибсхонасидагилар сони 1345 нафарга (8 фоизга) кўпайиб, уларнинг умумий сони 19119 нафарга етди.

Қамоққа олинганлар сони ҳар 100 000 катталарга нисбатан 214 нафарни ташкил этади, уларнинг 92 фоизи эркаклардир.

Энг юқори қамоққа олиш даражаси маҳаллий австралияликлар орасида қайд этилган: 100 000 маҳаллий катталарга нисбатан 2559 маҳбус. Бу жами қамоқхона маҳбусларининг 37 фоизини ташкил қилади.

World Prison Brief маълумотларига кўра, Австралия қамоққа олиш кўрсаткичлари бўйича G20 давлатлари орасида еттинчи ўринда туради.

Аввал хабар қилинганидек, Туркия қамоқхоналаридаги маҳбуслар сони меъёрдан ошиб кетган.