2025 йилни гендер тенглиги йили деб эълон қилиш таклиф этилди

ASTANA. Kazinform – Қозоғистон касаба уюшмалари федерацияси раиси Сатибалди Даулеталин меҳнаткаш аёллар форумида илк бор гендер тенглиги масаласини кўтарди.

“Гендер тенглиги умумий муаммо, уни ҳал қилиш ҳамма учун фойдалидир. Кўпгина мамлакатларда гендер камситиш муаммоларини ҳал қилиш учун ҳукумат идоралари ёки тенглик вазирликлари ташкил этилган. Касаба уюшмалари федерацияси 2025 йилни гендер тенглиги йили деб эълон қилишни таклиф қилмоқда. Касаба уюшмаларида хотин-қизлар вакиллигига келадиган бўлсак, бошланғич ташкилот раисларининг кўпчилигини аёллар ташкил этади. Улар бевосита одамлар билан ишлайди, уларнинг саволларига жавоб беради ва менежер билан муаммоларга аниқ ечим топади. Балки бу аёлларнинг масъулиятли ва ижрочи эканлигидандир”, – деди Сатибалди Даулеталин пойтахтда ўтказилган Қозоғистон меҳнаткаш аёлларининг 1-форумида.

Касаба уюшмалари федерацияси раҳбарининг сўзларига кўра, хотин-қизлар ишдаги муаммоларга бефарқ эмас, чунки улар эмоционаллидир.

“Касаба уюшмамиз тизимидаги тармоқ бирлашмалари ва ҳудудий ташкилотларига асосан эркаклар раҳбарлик қилади, яъни 23 та тармоқ бирлашмаларининг атиги 4 тасини аёллар бошқаради, 18 та ҳудудий ташкилот орасида эса атиги 5 нафар аёл раҳбарлик қилади. Кўриб турганингиздек, касаба уюшма ташкилотларининг юқори бўғинларида уларнинг аъзолиги умумий аъзоликдаги улушга мутаносиб эмас”, –деди у.

Астанада Қозоғистон меҳнаткаш аёлларининг “Меҳнат соҳасида аёллар: янги қарорлар вақти” 1-форуми бўлиб ўтмоқда. Тадбир ташкилотчиси – Қозоғистон касаба уюшмалари федерацияси.