2025 йилда Қозоғистонда бизнесни қўллаб-қувватлаш учун 275,2 миллиард тенге ажратилади

ASTANA. Kazinform - Тадбиркорликни комплекс қўллаб-қувватлаш дастури доирасида жорий йилда кичик ва ўрта бизнесни имтиёзли молиялаштириш чора-тадбирлари учун 275,2 миллиард тенге йўналтирилади, деб хабар беради Kazinform.

Уларнинг 196,4 миллиарди республика бюджети, 78,8 миллиарди маҳаллий бюджетлар ҳисобидан таъминланган. “Даму” жамғармаси дастур оператори ҳисобланади.

“Бугунги кунда тадбиркорликни давлат томонидан қўллаб-қувватлашнинг энг оммабоп чора-тадбирлари Комплекс дастур доирасида амалга оширилаётган “Бизнеснинг йўл харитаси” ва “Оддий нарсалар иқтисодиёти” дастурлари воситалари бўлиб қолмоқда”, – дейди Миллий иқтисодиёт вазирлиги тадбиркорликни давлат томонидан қўллаб-қувватлаш ва ҳимоя қилиш департаменти директори Дарин Абдуали.

2024 йил якуни бўйича кредит субсидиялари ҳисобидан имтиёзли молиялаштириш чора-тадбирлари билан умумий қиймати қарийб 1 триллион тенгега тенг 17 мингдан ортиқ бизнес-лойиҳа қамраб олинган. 310 миллиард тенге миқдоридаги 8 мингдан ортиқ лойиҳа учун кредит кафолатлари берилди.

Миллий иқтисодиёт вазирлиги маълумотларига кўра, энг кўп лойиҳалар Алмати, Астана, Чимкент, шунингдек, Алмати, Туркистон ва Ақтўбе вилоятларида амалга оширилган. Тармоқлар орасида ишлаб чиқариш – 33,3 фоиз, транспорт ва омборхона хизмати – 17 фоиз, таълим – 7,8 фоиз билан етакчилик қилмоқда.