20 мартдан Temu Ўзбекистонда блокланади
TASHKENT. Kazinform - Ўзбекистон қонунчилиги талабларига мувофиқ 20 мартдан бошлаб Temu платформасидан фойдаланиш белгиланган тартибда чекланади, дея хабар беради Kazinform Ўзбекистон Солиқ қўмитаси матбуот хизматига таяниб.
Қайд этилишича, электрон тижорат операторлари, хусусан, электрон савдо платформалари операторлари сифатида фақат юридик шахслар — Ўзбекистон резидентлари фаолият юритиши мумкинлиги белгиланган.
“Мамлакатимиз фуқароларига хизмат кўрсатувчи хорижий электрон савдо платформалари фаолиятини ўрганиш жараёнида айрим электрон савдо платформалари томонидан Ўзбекистон Республикасининг электрон тижорат, чакана савдо, реклама, шахсий маълумотларни ҳимоя қилиш, истеъмолчилар ҳуқуқларини ҳимоя қилиш, муаллифлик ҳуқуқи ва турдош ҳуқуқлар соҳасидаги қонун ҳужжатлари талабларига риоя этмаётганлиги аниқланди”, — дейилади хабарда.
Қўмита тушунмовчиликларни олдини олиш мақсадида бугунги кундан бошлаб Тему платформасида буюртма бермасликларини сўради.
“Бунда, агар буюртма бундан олдин амалга оширилган бўлса, платформада тўловни қайтаришни ташкил этиш тавсия этилади”, — дейилади хабарда.
Истиқболли лойиҳалар миллий агентлиги ва Солиқ қўмитаси фуқароларни Ўзбекистон ҳудудида ўз фаолиятини маҳаллийлаштирмаган ёки мамлакатда Солиқ қўмитасининг электрон хизматлар кўрсатувчи хорижий компаниялар ва маркетплейслар рўйхатига кирмаган хорижий электрон савдо платформалари хизматларидан фойдаланмасликка, эҳтиёт чораларини кўришга, шахсий ва бошқа маълумотларни бундай субектларга бермасликка чақирди.
Эслатиб ўтамиз, аввалроқ Тошкентда Coca-Cola, Pepsi, Evos, Safia компаниялари жаримага тортилгани ҳақида хабар берган эдик.