Жорий йилнинг ўтган ўн ойида Жетису вилоятида саноат ишлаб чиқариши 3,9 фоизга ошди – Президент ташрифи
ASTANA. Kazinform – Жетису вилояти ҳокими Бейбит Исабаев Қасим-Жомарт Тоқаевга минтақанинг ижтимоий-иқтисодий ривожланиши ҳақида гапирди, деб хабар берди Ақорда матбуот хизмати.
Вилоят ҳокимининг таъкидлашича, жорий йилнинг биринчи ярмида жами ҳудудий маҳсулот ҳажми 6,2 фоиз ўсиш билан 781 миллиард тенгени ташкил этди. Йил охиригача эса 7,1 фоиз ўсишга эришилади. Ўн ойлик якунларига кўра, қисқа муддатли иқтисодий кўрсаткич 112,8 фоизни ташкил этди.
Қишлоқ хўжалигини ривожлантиришда ижобий динамика кузатилмоқда. Шунингдек, ишлаб чиқариш, саноат, савдо ва қурилиш тармоқлари ҳажми ҳам ўсди. Жорий йилда вилоятда 247,6 минг квадрат метр уй-жой фойдаланишга топширилди. Бу ўтган йилга нисбатан 4,1 фоизга кўпдир.
Давлат раҳбарига янги инвесторларни жалб этиш ва ҳудуднинг инвестициявий жозибадорлигини ошириш борасида амалга оширилаётган ишлар тўғрисида маъруза қилинди.
Йил бошидан буён 1,3 баравар ўсиш билан 327,1 миллиард тенге сармоя киритилди. Шу билан бирга, хусусий инвестициялар сони 1,6 баробар ошди. Бейбит Исабаевнинг айтишича, 2024-2030 йилларга мўлжалланган 3,5 триллион тенгелик инвестиция портфели яратилган. Унинг доирасида 190 та лойиҳа амалга оширилиб, 11 минг 800 дан ортиқ иш ўрни яратилади. Жорий йилда 54,9 миллиард тенгелик 48 лойиҳа амалга оширилмоқда.
Бундан ташқари, вилоятдаги саноат ҳақида ҳам сўз юритилди. Жетису вилоятида 549 та корхона рўйхатга олинган бўлиб, 30 мингдан ортиқ киши иш билан таъминланган. Жорий йилнинг ўн ойида саноат маҳсулотлари ишлаб чиқариш ҳажми 3,9 фоизга ошди.
Қасим-Жомарт Тоқаев минтақадаги янги ташаббусларни олқишлади. Шунингдек, ижтимоий-иқтисодий ривожланиш суръатларини сақлаб қолиш, бу борадаги ишларни давом эттириш бўйича топшириқлар берди.
Бунгача Қасим-Жомарт Тоқаевнинг Жетису вилоятига хизмат сафари “Талдиқорған” саноат зонасида жойлашган «ASMA INDUSTRIAL» заводи фаолияти билан танишишдан бошлангани ҳақида ёзган эдик.
