Ёшлар ўртасидаги Осиё ўйинлари мезбонлиги Ўзбекистондан олиб қўйилди
TASHKENT. Kazinform – Осиё олимпия кенгаши ёшлар ўртасидаги Осиё ўйинлари Ўзбекистонда ўтказилиши бекор қилинганини эълон қилди. Мусобақага энди Баҳрайн мезбонлик қилади, деб ёзади Gazeta.uz.
2025 йилда Тошкентда ўтиши режалаштирилган Ёшлар ўртасидаги Осиё ўйинлари Ўзбекистонда ўтказилмайдиган бўлди. Мусобақага Баҳрайн мамлакати мезбонлик қилади. Бу маълумотни Ўзбекистон миллий олимпия қўмитаси матбуот хизмати тасдиқлаган. Шунингдек, 2 декабрь куни Осиё олимпия кенгаши ижтимоий тармоқлардаги саҳифасида бу ҳақда расман хабар берди.
«Осиё олимпия кенгаши Ўзбекистон пойтахти Тошкентда ўтказилиши режалаштирилган III Осиё ўсмирлар ўйинлари мамлакатда ўтказилиши бекор қилинганини эълон қилди. Энди тадбир 2024 йил 2 декабрдаги Ижроия кенгаши йиғилишида қарор қилинганидек, 2025 йилда Баҳрайнда ўтказилади», – дейилади хабарда.
Ўзбекистон 2025 йилги Осиё ўйинларига мезбонлик қилиш ҳуқуқини 2019 йил сентябрь ойида Доҳада бўлиб ўтган ООК қарорига кўра олганди. Вазирлар Маҳкамасининг 2020 йил 8 августдаги «Танловга тайёргарлик кўриш чора-тадбирлари тўғрисида»ги қарори ҳам тасдиқланган.
