Япония Бош вазири Сигэру Исиба истеъфога чиқиши мумкин – ОАВ

TOKIO. Kazinform — Япония Бош вазири Сигэру Исиба истеъфога чиқиш ниятида. У бу ҳақда август ойи охиригача эълон қилиши кутилмоқда. Бу ҳақда Mainichi газетасига таяниб, ТАСС хабар берди.

Mainichi газетаси маълумотига кўра, Исиба истеъфо ҳақида аллақачон ўз атрофига маълум қилган.

У ҳокимиятдаги Либерал-демократик партия (ЛДП) раҳбари сифатида 20 июль куни бўлиб ўтган сайловларда партия блоки парламентнинг юқори палатасида кўпчилик овозни йўқотганидан сўнг, истеъфога чиқишга қарор қилган. Бу Исиба учун кетма-кет иккинчи йирик сайловдаги мағлубият ҳисобланади.

Маълумотларга кўра, у истеъфо қарори олдидан Япониянинг собиқ бош вазирлари – Ёшихидэ Суга, Фумио Кисида ва Таро Асо билан учрашув ўтказиши мумкин. Газета манбасининг таъкидлашича, бу каби қадам одатда кузатилмайди ва Исиба “уч собиқ бош вазир олдида бош эгади”.

Эслатиб ўтамиз, ўтган йили кузда ҳам ҳокимият коалицияси парламентнинг қуйи палатасида кўпчилик ўринни йўқотган эди. Шу сабаб, маҳаллий ОАВ хабарига кўра, ЛДП ичида Исибанинг истеъфосини талаб қилувчилар сони ортган.