Япония бош вазири қишлоқ хўжалиги вазирининг гуруч ҳақидаги сўзлари учун узр сўради
ASTANA. Kazinform – Япония қишлоқ хўжалиги вазири Таку Это танқидга учради. У ўз баёнотида гуруч сотиб олмаслигини, чунки уни ҳомийларидан катта миқдорда бепул олишини айтган, деб хабар беради Kyodo News.
Бу баёнот гуруч нархининг кескин ошиши фонида янгради.
Япония Қишлоқ хўжалиги вазирининг якшанба куни хайрия йиғинида айтган сўзлари вазирлик гуруч нархини барқарорлаштириш мақсадида захирадан уни ажратиш ҳақида қарор қабул қилганидан сўнг янгради. Ўтган йилга нисбатан бу асосий озиқ-овқат маҳсулотининг нархи ҳосил камайиши туфайли деярли икки бараварга ошган ва ҳануз юқори даражада сақланмоқда.
“Мен гуруч харид қилмайман, чунки менинг ҳомийларим уни жуда кўп миқдорда беради. Уйимда шунчалик кўпки, ҳатто ўзим сотувга чиқарсам бўлади”, – деган эди Таку Это.
Шундай қилиб ҳукумат танқидларга учради, чунки у нарх ошиши ўтган йил куздаёқ бошланган бўлса-да, захира гуручини фақат март ойида бозорга чиқара бошлади.
Бош вазир Сигэру Исиба вазир Этонинг баёнотини “жуда катта муаммо” деб атади.
“Уни лавозимга тайинлаган шахс сифатида ўзим ҳам чуқур узр сўрашим керак. Жавобгарлик менда ҳам бор”, — деди у журналистларга Этонинг тушунтиришини тинглаш арафасида.
Гуруч нархининг ошиб бориши аллақачон бошқа озиқ-овқат маҳсулотлари ва энергиянинг қимматлашувидан жабр кўраётган истеъмолчилар ҳолатини янада оғирлаштирди.
Kyodo агентлиги ўтган дам олиш кунлари ўтказган сўровномага кўра, респондентларнинг тахминан 87 фоизи ҳукуматнинг гуруч нархи ошишига қарши чораларини қониқарсиз деб баҳолаган. Исиба ҳукуматининг жамоатчилик орасидаги қўллаб-қувватлаш даражаси ўтган йил октябрда лавозимга келганидан бери энг паст кўрсаткичга тушган.
