Яқин Шарқдаги вазият минтақавий савдога салбий таъсир кўрсатиши мумкин — Шавкат Мирзиёев
TASHKENT. Kazinform – Ўзбекистон Яқин Шарқдаги вазиятнинг кескинлашув эҳтимолидан ташвишда. Бу ҳақда мамлакат Президенти Шавкат Мирзиёев республикада амалга оширилаётган ислоҳотлар самарадорлиги муҳокамасига бағишланган йиғилишда маълум қилди, деб хабар беради Kazinform агентлигининг Ўзбекистондаги мухбири Алихан Асқар.
Шавкат Мирзиёев сўнгги беш ойда мамлакат саноати 6,4% га, экспорти 18% га, хорижий инвестициялар ҳажми эса 46% га ўсганини қайд этар экан, Яқин Шарқдаги вазиятга ҳам алоҳида тўхталиб ўтди. Унинг таъкидлашича, шаклланаётган мураккаб вазият Марказий Осиё минтақасига ҳам салбий таъсир кўрсатиши мумкин.
“Яқин Шарқдаги зиддият давом этар экан, пандемиядан сўнг эндигина тиклана бошлаган савдо алоқаларини мустаҳкамлаш, транспорт йўлакларидан самарали фойдаланиш ва уларни ривожлантириш янада қийинлашади. Шу боис ҳар бир ҳоким, ҳар бир вазир ўз йўналиши бўйича имконият ва хавф-хатарларни баҳолай олиши, фаол ҳаракат қилиши лозим. Буйруқ кутиб ўтирмасдан, ташаббус кўрсата олиш керак”, – деди Шавкат Мирзиёев.
Эслатиб ўтамиз, бунгача Эрон баллистик ракеталар ва дронлар ёрдамида Исроилга йирик ҳужум уюштиргани ҳақида ёзган эдик.
Исроилнинг Эрон ҳудудига берган зарбаси натижасида 224 киши ҳалок бўлди, 1200 дан ортиқ киши жароҳатланди.
Эрон душанбага қараган кечаси Исроил ҳудудига яна ракета отди.
Исроил мудофаа кучларининг Теҳронга берган сўнгги учта зарбаси оқибатида 73 нафар аёл ва бола ҳалок бўлди.
