Вьетнамлик инвестор Qazaq Air авиакомпанияси номини ўзгартирди
ASTANA. Kazinform – Qazaq Air авиакомпанияси VietJet Kazakhstan деб ўзгартирилади. Бу ҳақда Астанада бўлиб ўтган Қозоғистон-Вьетнам бизнес давра суҳбатида “Самруқ-Қазна” АЖ бошқаруви раиси Нурлан Жақипов маълум қилди.
2023 йилда Qazaq Air компаниясини Вьетнамнинг VietJet Air компанияси сотиб олиши эълон қилинди.
Н. Жақиповнинг сўзларига кўра, ушбу битим хусусийлаштиришнинг комплекс режаси доирасида амалга оширилган. Харидор сифатида SOVICO Group компанияси аниқланди.
“Битимнинг барча шартлари бажарилди, тўлов қабул қилинди ва акциялар инвесторнинг шахсий ҳисоб рақамига ўтказилди. Ушбу стратегик шериклик нафақат авиаташувчи ва саноат ривожига ижобий таъсир кўрсатишга қаратилган, балки Қозоғистон ва Вьетнам ўртасидаги иқтисодий алоқаларни мустаҳкамлаш, ўзаро ўсиш ва минтақавий муносабатларни ривожлантириш учун янги уфқларни очиб беради. Биз SOVICO Group ва VietJet Air авиакомпанияларининг Qazaq Air авиакомпаниясини VietJet Kazakhstan янги бренди остида бошқариш ва операцияларида иштирок этиш ниятини юқори баҳолаймиз. Минтақада йўналишлар тармоғининг кенгайиши транспорт алоқаларини мустаҳкамлайди ва иқтисодий ўсишнинг янги нуқталарини яратади. Энди биз каттароқ ва бир-биримизга яқинроқ бўламиз”, – дейди Нурлан Жақипов.
