Ўзбекистон ялпи ички маҳсулотини 1 долларга ошириш учун 2,5 баробар кўп энергия сарфланади

TASHKENT. Kazinform – Ўзбекистонда йирик корхоналар учун электр энергияси, газ ва нефть маҳсулотлари истеъмоли нормалари тасдиқланади, деб хабар беради Kazinform агентлигининг Ўзбекистондаги мухбири Алихан Асқар.

Энергияни тежаш масалаларига бағишланган йиғилиш ўтказган Ўзбекистон Президенти Шавкат Мирзиёев ўтган йили мамлакатда 50 миллиард куб метр табиий газ ва 81 миллиард киловатт-соат электр энергияси ишлаб чиқарилганини таъкидлади.

Прогнозга кўра, 2035 йилга бориб Ўзбекистонда электр энергияси истеъмоли ҳажми 1,7 баробарга ошади. Бу эҳтиёжни қоплаш учун ишлаб чиқариш кўрсаткичларини оширишнинг ўзи етарли эмас. Шунга кўра, энергия тежаш имконини берувчи механизмларни жорий этишга устувор аҳамият бериш зарур.

Ўзбекистон раҳбари матбуот хизмати хабарига кўра, мамлакат ялпи ички маҳсулотини 1 долларга ошириш учун дунёнинг бошқа мамлакатларига нисбатан 2,5 баробар кўп энергия сарфланади. Шунингдек, электр энергиясининг 14 фоизи, табиий газнинг 7 фоиздан ортиғи тармоқларда истеъмол қилинади.

Бу муаммоларни ҳал этиш мақсадида Шавкат Мирзиёев мутасадди ташкилотларга қатор топшириқлар берди. Яъни, жорий йилда 1,6 миллиард куб метр табиий газ ва 3,5 миллиард киловатт-соат электр энергиясини тежаш режалаштирилган.

Бу натижага эришиш учун ҳар бир корхона ва ташкилотга илмий таҳлиллар асосида тавсиялар берилиб, стандартлар ўрнатилади. Бу ишлар эвазига электр энергияси таннархини 5-10 фоизга камайтириш режалаштирилган.