Ўзбекистон, Тожикистон ва Қирғиз Республикаси Осиё кубогини ўтказиш бўйича қўшма ариза топширди
TASHKENT. Kazinform - Осиё футбол конфедерацияси 2031 йилда Осиё қитъасининг энг нуфузли футбол турнири бўлган Осиё кубоги мезбонлигига номзодларни кўриб чиқишни бошлади, деб ёзади ЎзА.
Сўнгги йилларда Марказий Осиёда футболни ривожлантириш борасида амалга оширилаётган ислоҳотлар, яратилаётган шароитлар, халқаро майдондаги нуфузидан келиб чиққан ҳолда Ўзбекистон, Тожикистон, Қирғиз Республикаси футбол уюшмалари биргаликда Осиё кубоги мезбонлигини юқори савияда ўтказишга ишонч билдирган ҳолда ўз қўшма номзодини илгари сурди.
Бугунги кунда қўшни мамлакатлар билан бирга Ўзбекистон ҳам нуфузли мусобақани қабул қилишга ҳар томонлама тайёр. Тошкент, Наманган, Фарғона, Қарши каби шаҳарларда стадионлар халқаро стандартларга мос равишда тартибга келтирилди.
Марказий Осиё ҳар доимгидек ўзининг меҳмондўстлиги, профессионал ёндашуви, футболга фидойилиги ва албатта футболсевар мухлислар меҳри билан бутун Осиё эътиборини қозонишга тайёр, дея хабар бермоқда ЎФА матбуот хизмати.
Маълумот ўрнида: Ўзбекистонда сўнгги йилларда U20, U23 ёш тоифаларида Осиё кубоги, футзал бўйича жаҳон чемпионати юқори савияда ташкил этилди ва бу мусобақалар келгусидаги нуфузли турнирлар олдидан улкан тажриба вазифасини ўтади.
